काठमाडौँ । ‘राष्ट्रियताको रक्षा र सङ्घीयताको खारेजी’लाई मुख्य एजेण्डा बाउँदै राष्ट्रिय जनमोर्चा निर्वाचन क्षेत्र नम्बर ४ का उम्मेदवार छविबहादुर खनालले विभिन्न स्थानहरूमा घरदैलो तथा कोणसभा सम्पन्न गर्नु भएकाे छ ।
चुनावी प्रचारप्रसारका क्रममा उम्मेदवार छविबहादुर खनालको नेतृत्वमा रहेको टोली एकता बस्ती, बालुवा खानी, साप्रेढुङ्गा, सुन्दर बस्ती, भङ्गाल, चुनीखेल, कपन, आकाशे धारा, सुकेधारा र चाबहिल लगायतका स्थानहरूमा पुगेको थियो ।
बालुवाखानीमा पार्टीका का.वा. अध्यक्ष तथा समानुपातिक उम्मेदवार रश्मिराज नेपालीले कोणसभालाई सम्बोधन गर्नुभएको थियो ।सम्बोधनमा उहाँले यस पटकको निर्वाचन विगतको तुलनामा भिन्न रहेको बताउँदै यसलाई अमेरिकी र भारतीय साम्राज्यवाद विरुद्धको सङ्घर्षको रूपमा व्याख्या गर्नुभयो । विशेषगरी एमसीसी र एसपीपी जस्ता सम्झौतामार्फत वैदेशिक शक्तिहरूले नेपालको सार्वभौमसत्ता र अस्तित्व समाप्त पार्न खोजेको आरोप लगाउनु भयो । उहाँले देश बचाउनु नै अहिलेको मुख्य चुनौती रहेको उल्लेख गर्नुभयो ।
त्यसैगरी अर्का नेता तथा समानुपातिक उम्मेदवार ठाकुर खनालले सङ्घीयताले देशलाई आर्थिक रूपमा टाट पल्टाएको र यसले राष्ट्रिय एकतालाई कमजोर बनाएको दाबी गर्नुभयो । २०४६ सालयता सत्तामा रहेका ठुला दलहरू भ्रष्टाचारमा लिप्त भएको र उनीहरूका कारण युवाहरू वैदेशिक रोजगारीमा जान बाध्य भएको बताउनु भएको थियो । उहाँले अन्तमा काठमाडौँ क्षेत्र नं. ४ मा प्रत्यक्षतर्फका उम्मेदवार छविबहादुर खनाल र समानुपातिकतर्फका उम्मेदवारहरू चित्रबहादुर केसी, रश्मिराज नेपाली र दुर्गा पौडेल लगायलाई विजयी गराउन समेत आह्वान गर्नुभयो ।
अभियानमा राष्ट्रिय जनमोर्चाका अर्का समानुपातिक उम्मेदवार मीनापुनले पनि मतदातासंग भेटघाट तथा भाेट माग्नु भएकाे थियाे ।
प्रचारप्रसार कार्यक्रममा उम्मेदवार छवि खनाल, नेताहरू रश्मिराज नेपाली, आनन्द शर्मा, रामप्रकाश पुरी, ठाकुर खनाल, मिना पुन, सुधा शर्मा, गोविन्द शर्मा, चन्द्र थापा, निमबहादुर बुढा, विष्णु वली, धनपति सापकोटा, मदन शर्मा, हिरा रोका, जितेन्द्र ढकाल, प्रेम थापा, विद्या अधिकारी, प्रेम मोक्तान र दिपक रिजाल लगायत सहभागि हुनुहुन्थ्यो ।
चावहिलमा उम्मेदवार खनाललाई लेखापढी व्यवसायीहरुको तर्फबाट स्वागत गर्दै जितका लागि शुभकामना प्रदान गरिदिएको थियो भने राष्ट्रिय जनमोर्चाका केन्द्रीय सल्लाहकार आनन्द शर्माले व्यवसायीलाई धन्यवाद ज्ञापन गर्नुभएको थियो ।
