खलङ्गा । जाजरकोटको गाउँगाउँमा राष्ट्रिय जनमोर्चाको प्रचार अभियान पुगेको छ ।
राजमोको तर्फबाट रत्नबहादुर खड्काको उम्मेदवारी दर्ता भएसँगै राजमो जाजरकोट माघ २१ गतेदेखि निरन्तर प्रचार अभियानमा जुटेको हो ।
राजमो केन्द्रीय सदस्य रत्नविक्रम प्यासीका अनुसार माघ ५ गते जिल्ला भेलासँगै राजमोले माघ ६ गते खड्काको उम्मेदवारी दर्ता गराएको थियो ।
त्यसलगत्तै माघ २१ गतेदेखि २९ गतेसम्म छेडागाड नगरपालिकाको वडा नं. ५, १० र ११ नम्बर वडामा घरदैलो कार्यक्रम सम्पन्न गरेको थियो । सोही अवधिमा राँगा, नल्फु, झाप्रा, खलसकुर, मिलबजार, थलहमा पनि घरदैलोसँगै पर्चा वितरण गरिएको थियो ।
फागुन १ गते राजमो टोलीले भेरी नगरपालिकाको बोहरागाउँ, कुदु, भुन्चौर, रावतगाउँ, रानागाउँ तथा शिवालय गाउँपालिकाको छेडा, मर्कबजार, बालुवाखार, मनघाट बजारमा घरदैलो गरेको थियो ।
फागुन ३ गते बडावन, दसेरा, जेबा, सुयाँडामा पनि राजमोको प्रचार टोली पुगेको थियो ।
फागुन ४ गते नलगाड नगरपालिकाको कालिकाबजार, दल्ली, रिम्नामा पर्चा वितरणसँगै घरदैलो कार्यक्रम र कोणसभा सम्पन्न गरिएको थियो । त्यसै क्रममा सदरमुकाम खलङ्गाबजारमा घरदैलो, कोणसभा पनि सम्पन्न गरिएको थियो ।
सो स्थानको कोणसभामा जाजरकोटका उम्मेदवार खड्का, रक्तिम सांस्कृतिक अभियानका अध्यक्ष गिरिप्रसाद बुढा, राजमो सल्यानका अध्यक्ष ढकनप्रसाद शर्मा, राजमो जाजरकोटका अध्यक्ष पूर्णबहादुर बुढालगायतले मन्तव्य राख्नुभएको थियो ।
फागुन ५ गते कुशे गाउँपालिकाको बावनगाउँ, रिसखा, पाँचकाटिया, दमदाल, ढिमे, खुर्पा, ज्वारगाउँ, घरमाङमा, समैलामा बैठक तथा अन्य कार्यक्रम सम्पन्न भएको थियो ।
फागुन ६ गते सोही पालिकाको टालेगाउँ, तम्ती, धाउनी, सेराबजार, पजारु, राजीकोट, थलहसम्म प्रचार टोली पुगेर सोही स्थानमा बास बसेको थियो ।
फागुन ७ गते राजमोले थलहमा कोणसभा सम्पन्न भएको थियो । सभालाई राजमो केन्द्रीय सदस्य प्यासी, रक्तिमका अध्यक्ष बुढा र राजमो सल्यानका अध्यक्ष शर्माले मन्तव्य राख्नुभएको थियो ।
सोही दिन शिवालय गाउँपालिकाको शिवालयबजारमै घरदैलो तथा कोणसभा सम्पन्न भएको थियो । सो स्थानमा पनि प्यासी, बुढा र शर्माले सम्बोधन गर्नुभएको थियो ।
फागुन ८ गते जुनिचाँदे, देसीबाटा, पराले, कारिगाउँ, डाँडाकोट, सानोखोला, बडकुले, सुवानाउली र सिउरुघाटमा राजमोको प्रचारटोली पुगेको थियो ।
फागुन ९ गते छेडागाड नगरपालिकाको कार्कीगाउँ तथा भेरी नगरपालिकाको भुरगाउँ र जगतिपुरमा घरदैलो कार्यक्रम सम्पन्न भएको थियो ।
राजमो केन्द्रीय सदस्य प्यासीका अनुसार टोलीमा राजमो जाजरकोटका सचिव रामबहादुर शाहीलगायतको सहभागिता रहेको छ ।
‘हालसम्म जाजरकोटका सातओटा पालिकामध्ये छओटा पालिकामा प्रचारटोली पुगिसकेको छ’ प्यासीले भन्नुभयो– ‘फागुन १० गते आराम गरेपछि फागुन ११ गतेदेखि पुन: प्रचार कार्यक्रमले तीव्रता पाउनेछ ।’
