काठमाडौँ । राष्ट्रिय जनमोर्चाका केन्द्रीय सदस्य नारायण जिसीको ललितपुरको लगनखेलस्थित हस्पिकमा निधन भएको छ । उहाँको आज फागुन १ गते निधन भएको हो ।
जिसीले गत जेठ महिनामा हरियाणाको रोहतक स्थित पिजीआईमा ब्रेन ट्युमरको अपरेशन गर्नुभएको थियो । त्यस पछिका दिनहरूमा उहाँले काठमाडौँको महाराजगञ्जस्थित त्रिभुवन शिक्षण अस्पतालमा स्वास्थ्यलाभ लिइरहनुभएको थियो । त्रिभुवन शिक्षण अस्पतालले माघ २८ गते उहाँको उपचार लामो समयसम्म चल्ने भन्दै ललितपुरको लगनखेलस्थित हस्पिकमा रेफर गरेको थियो । जिसीको उपचार कै क्रममा हस्पीटमा निधन भएको राजमो केन्द्रीय उपाध्यक्ष दुर्गा पौडेलले युगदर्शनलाई जानकारी गराउनु भएको छ ।
पार्टीमा स्पष्ट वक्ता एवं धारणा राख्नु हुने नेताको रुपमा जिसीले आफ्नो छवि बनाउनु भएको थियो ।
यसैबीच नेपाल कम्युनिस्ट पार्टी (मसाल) का महामन्त्री मोहनविक्रम सिंहले नारायण जिसीको निधनप्रति गहिरो दुःख व्यक्त गर्दै शोक व्यक्त गर्नुभएको छ । महामन्त्री सिंहले जिसीको निधनले पार्टीलाई र सिंगो कम्युनिस्ट आन्दोलनलाई क्षति पुगेको बताउनु भएको छ ।
महामन्त्री सिंह यतिवेला चुनावी कार्यक्रम अन्तर्गत देशका विभिन्न जिल्लाहरूमा पुगिरहनुभएको छ । आज चितवनमा सम्पन्न एक सभालाई सम्बोधनका क्रममा महामन्त्रीले जिसीप्रति शोक व्यक्त गर्नुका साथै परिवारजनमा गहिरो समवेदना व्यक्त गर्नुभएको हो ।
नारायण जिसीले लामो समयसम्म भारत प्रवासमा रहेर मूल प्रवाह अखिल भारत नेपाली एकता समाजको विभिन्न महत्वपूर्ण जिम्मेवारीहरू निर्वाह गर्दै आउनुभएको थियो । हरियाणा सरकारको खाने पानी विभागमा नोकरी गरि स्वच्छिक अवकास लिई स्वदेशमा राष्ट्रिय जनमोर्चामा सक्रिय रुपमा काम गर्दै आउनुभएको थियो ।
