दाङ, २९ माघ । राष्ट्रिय जनमोर्चा दाङ क्षेत्र नम्बर १ का प्रतिनिधिसभा सदस्य पदका उम्मेदवार गणेश आचार्यले कुशासनको अन्त्य, जनतामा फैलाइएका भ्रमको चिरफार र बलियो संगठन नै निर्वाचन जित्ने प्रमुख आधार भएको बताएका छन् ।

बिहीबार माघ २९ गते दाङको लमहीमा आयोजित पत्रकार सम्मेलनमा बोल्दै उम्मेदवार आचार्यले वर्तमान राजनीतिक परिस्थिति, शासन प्रणालीको अवस्था र राष्ट्रिय सार्वभौमसत्तामाथि देखिएको चुनौतीबारे स्पष्ट धारणा राखेका छन् ।

पत्रकार सम्मेलनमा आचार्यले देशको राजनीतिक अवस्थाप्रति गहिरो चिन्ता व्यक्त गर्दै अहिले आम जनतामा निराशा छाएको उल्लेख गरे । ‘जनतामा देखिएको निराशाको मुख्य जिम्मेवारी पालैपालो सरकारमा बसेका दलहरूले लिनुपर्छ,’ उनले भने– ‘देशमा पैदा भएको संकट, वेथिति र अस्थिरताको कारक तिनै शक्तिहरू हुन्।’

उनले विगतका सरकारहरूले जनताको अपेक्षा अनुसार सुशासन दिन नसकेको, विकासका ठूला आश्वासन दिए पनि व्यवहारमा कार्यान्वयन कमजोर भएको आरोप लगाए ।

आचार्यले कुशासनलाई लोकतन्त्रको सबैभन्दा ठूलो चुनौतीका रूपमा चित्रित गर्दै पारदर्शिता, जवाफदेहिता र विधिको शासन सुदृढ नगरेसम्म जनताको विश्वास फर्कन नसक्ने बताए । ‘कानून सबैका लागि समान हुनुपर्छ, तर व्यवहारमा शक्तिशालीलाई छुट र सामान्य नागरिकलाई कडाइ गर्ने प्रवृत्ति बढेको छ,’ उनले टिप्पणी गरे । यस्तो अवस्थाले लोकतान्त्रिक मूल्य र मान्यतालाई कमजोर बनाउने उनको भनाइ थियो ।

उनले निर्वाचनलाई केवल पद प्राप्त गर्ने माध्यमका रूपमा नलिन आग्रह गर्दै यसलाई नीतिगत परिवर्तन र सुशासन स्थापना गर्ने अवसरका रूपमा हेर्नुपर्ने बताए । ‘हामी पदका लागि होइन, विचार र सिद्धान्तका लागि चुनावमा होमिएका हौँ,’ उनले भने- ‘जनताको पक्षमा उभिने प्रतिबद्धतासहित हामी मैदानमा आएका छौँ ।’ राष्ट्रिय जनमोर्चाले सधैं राष्ट्रियता, लोकतन्त्र र जनजीविकाको सवाललाई प्राथमिकतामा राख्दै आएको दाबी उनले गरे ।

आचार्यले भ्रमको राजनीति अन्त्य गर्न आवश्यक रहेको धारणा राखे। अहिले सामाजिक सञ्जाल र प्रचार माध्यममार्फत विभिन्न भ्रम फैलाइने काम भइरहेको छ,’ उनले भने– ‘जनताले तथ्यमा आधारित निर्णय गर्नुपर्छ, हल्ला र अफवाहका आधारमा होइन ।’ उनले मतदातालाई सचेत रहन र आफ्‌ना प्रतिनिधि छान्दा विगतको कार्यसम्पादन र स्पष्ट नीति हेर्न आग्रह गरे।

देशको समग्र अवस्थाबारे बोल्दै उनले आर्थिक संकट, बेरोजगारी, महँगी र युवाको विदेश पलायनलाई गम्भीर समस्या बताए। ‘युवा पुस्ता रोजगारीको खोजीमा विदेशिन बाध्य छन्, गाउँ–बस्ती खाली हुँदै गएका छन्‌’, उनले भने– ‘सरकारले दीर्घकालीन योजना बनाएर देशमै रोजगारी सिर्जना गर्नुपर्छ।’ उत्पादनमुखी अर्थतन्त्र, कृषि र उद्योगमा लगानी वृद्धि तथा स्थानीय स्रोत–साधनको अधिकतम उपयोगमार्फत मात्र आर्थिक आत्मनिर्भरता सम्भव हुने उनले बताए ।

वैदेशिक शक्तिहरूको बढ्दो हस्तक्षेपप्रति पनि उनले चिन्ता व्यक्त गरे । ‘वैदेशिक शक्तिहरूको हस्तक्षेप लुकाउन नसकिने अवस्थामा पुगेको छ’, उनले भने– ‘यसले हाम्रो सार्वभौमसत्ता कमजोर बनाउने खतरा बढाएको छ ।’ उनले राष्ट्रिय स्वाधीनता कुनै पनि दलगत स्वार्थभन्दा माथि हुनुपर्ने स्पष्ट पारे । ‘देशलाई घात हुने अवस्थामा मुलुक जाने हो कि भन्ने जोखिम देखिएको छ। सार्वभौमसत्ताभन्दा दलिय विवाद ठूलो कुरा होइन’, उनले जोड दिए ।

उनले राष्ट्रिय एकता, स्वाधीनता र संविधानको संरक्षणलाई सबै राजनीतिक शक्तिहरूको साझा जिम्मेवारीका रूपमा लिनुपर्ने बताए । बाह्य प्रभावभन्दा आन्तरिक एकता बलियो बनाउनु आवश्यक रहेको उनको भनाइ थियो। ‘हामीबीच मतभेद हुन सक्छ, तर देशको हितमा सबै एक हुनुपर्छ’, उनले आग्रह गरे।

पत्रकार सम्मेलनमा उनले संगठन सुदृढीकरणलाई पनि विशेष जोड दिए। ‘बलियो संगठन बिना राजनीतिक लक्ष्य हासिल गर्न सकिँदैन’, आचार्यले भने– ‘गाउँ–गाउँमा संगठन सशक्त बनाउँदै जनतासँग प्रत्यक्ष संवाद बढाएका छौं।’ जनताको समस्या प्रत्यक्ष सुन्ने, समाधानका लागि पहल गर्ने र निरन्तर सम्पर्कमा रहने नीति आफूहरूले अवलम्बन गरेको उनले जानकारी दिए। उम्मेदवार आचार्यले निर्वाचन जितेपछि क्षेत्रका प्राथमिक समस्याहरू समाधानमा केन्द्रित हुने प्रतिबद्धता जनाए। सडक, शिक्षा, स्वास्थ्य, कृषि तथा सिँचाइका विषयलाई प्राथमिकतामा राख्ने उनको भनाइ थियो । ॅविकास केवल भाषणमा सीमित हुनुहुँदैन, परिणाम देखिने गरी काम हुनुपर्छ’, उनले भने। स्थानीय तह, प्रदेश र संघीय सरकारबीच समन्वय गरी योजनाहरू प्रभावकारी रूपमा कार्यान्वयन गर्नुपर्ने उनले बताए।

आचार्यले भ्रष्टाचारविरुद्ध शून्य सहनशीलताको नीति अपनाउने प्रतिबद्धता जनाउँदै सार्वजनिक स्रोतको दुरुपयोग रोक्न कडाइ गरिने बताए। ‘जनताको करबाट उठेको पैसाको सही उपयोग हुनु अनिवार्य छ’, उनले भने– ‘अनियमितता गर्ने जोसुकै भए पनि कारबाही हुनुपर्छ ।’ आचार्यले मतदातासँग विश्वासको मत माग्दै सुशासन, पारदर्शिता र राष्ट्रिय स्वाभिमानको पक्षमा उभिन आह्वान गरे । ‘हामी जनताको भरोसालाई शक्तिमा बदल्नेछौँ’, उनले भने– ‘कुशासनको अन्त्य, भ्रमको चिरफार र बलियो संगठन मार्फत दाङ क्षेत्र नम्बर १ मा परिवर्तनको आधार तयार पार्ने छौँ।’ आचार्यले ३२ बुँदे प्रतिबद्धता पत्र सार्वजनिक समेत गरेका छन् । एक चरणको चुनावी अभियान सम्पन्न भइसकेको र फागुन ४ गतेदेखि मसिनो गरी घरदैलो अभियान सुरु गरिने जानकारी दिए । निर्वाचन अघि सारिएको सन्दर्भमा उनले पार्टी अझ सक्रिय भएर जनतामाझ जाने बताएका छन् । निर्वाचन परिचालन समितिका संयोजक बसन्त पौडेलको अध्यक्षतामा भएको पत्रकार सम्मेलनको सञ्चालन युवा परिचालन समितिका संयोजक बसन्तराज आचार्यले गरेका थिए ।