एमाले, कांग्रेस, माओवादीले लामो समयसम्म सत्तामा बसेर जुन राँइदाँइ मच्चाए, देशका नदिनाला, घाट, वनजंगल, चारैतिर जुन दाँइमाडो हाले त्यस्तो अवस्थामा उम्रनसक्ने खेतिपाती होइन । झारपातै हो । बनमारा झार हो । विषालु वनस्पति हो । घण्टी पार्टी त्यसको उदाहरण हो । अनि त्यस्तो विषालु वनस्पतिको बिउ छर्ने कर्ता , बियाँठे एमाले कांग्रेस माओवादी नै हुन ।
अहिले कोहि कोहि १७ हजार मान्छे मारेर बाँदर नियन्त्रण गर्न पर्वतका गाउँगाउँ डुल्ने कुरा गरेका छन् । १७ हजार मान्छे मारेर बाँदर नियन्त्रण गर्न गाउँगाउँ डुल्ने कुरा आश्चर्य लाग्दा छन् । हास्यास्पद छ, ढिलै सहि यत्तिको बुद्धि पलाएकोमा पनि धन्यवादै छ ।
अर्का कोहिकोही रुखका बुढा भएका हाँगाविंगा छिमलेम र नयाँ भएर आएम भनेका छन् । अब नयाँ मिठामिठा रसिला फल लाग्छम् हाम्लाई भोट दिनुपर्छ यसपाली भन्दै हिडेका छन् । जुन रुखले नेपाली जनताको भाग्य रुख्यायो, नेपाललाई ओसेपमा राख्यो त्यही रुखमा दान गर्न देशभरी नै खाचो नपर्ला । पर्वतलाई त झनै नपर्ला ।
अनि कोही आफुले पर्वत जिल्लाको हावापानी माटोमा खेलेको, हावापानी माटोले आफुलाइ चिनेर दुई दुई पटक जिताईसकेको भन्दै हिडेका छन् । आफुले पर्वत जिल्लाको हावापानी माटोमा खेलेको, हावापानी माटोले आफुलाई राम्ररी चिनेको भन्ने कुरा पनि बेकारका कुरा हुन् । आफुले ढोगभेट गरेको माटोमा, कुटोकोदालो गरेको माटोमा विषालु झारपातका बीउ उम्रीसक्दा पनि आफुलाई माटोले चिनेको गर्व गरिरहनु धिक्कार हो । ह्याट्रिकको धाकधक्कु अहंकार हो । वास्तवमा जनतालाई तीन बर्ल्याङ हो । पर्वत र पर्वतवासी जनताले तीन बर्ल्याङ खेलाउन खोज्नेबाट सावधान रहनुपर्ने बेला हो यो ।
तीन बर्ल्याङ खेलाउन खोज्नेबाट सचेत रहौँ । पर्वतवासी जनताले विगतलाई पनि संझनुपर्छ । विगतलाई पनि याद गर्नुपर्छ र सुन्दर भविस्यको कल्पना कामना गर्नुपर्छ ।
पर्वतवासी जनताले यी सबै कुराको हेक्का राखेर मतदानमा सहभागी जनाऔँ । कसैको प्रभाव र लहैलहैमा नलागौँ ।
एमाले, काँग्रेस, माओवादीलाई चोर, डाका, फटाहा, हत्यारा, दलाल, राष्ट्रघाती भनेर रिसले घण्टी पार्टीतिर लहसिने टोलाउने भयानक गल्ती नगरौँ । माटो बिग्रे खनजोत गरेर, मल्चिङ गरेर सपारौंला । झारपात उखेलेर फालौंला । तर देश नै नरहने गरि विदेशीलाई सुम्पने काम नगरौँ ।
इमान्दारीपुर्वक घण्टी बजाउन चाहनेहरुले बुझ्नु जरुरी हुन्छ कि घण्टी बजाउँदै बजाउँदै दिल्ली दरबारमा देश बुझाइनेछ र दलाइलामालाई देशको मुख्यमन्त्री बनाइनेछ । नेपालमा घण्टीको खेल सकिनेछ । अनिपछी घण्टी बज्न बाङ्लादेश र श्रीलंकामा शुरु गर्नेछ । बज्दाबज्दै त्यता पनि घन्किनेछ । सकिनेछ ।
अन्त्यमा, पर्वत फलेवास नगरपालिका धर्मशाला निवासी प्रेमकुमारी तिवारीज्युको भनाइ स्मरण गर्दै विदा हुन चाहन्छु । उहाँले (२०८०/१०/२० माघमा अहिंसावादि रेडियो पर्वतको पुर्ख्यौली कुरा/अन्तर्वार्तामा) आफ्नो पालाको र अहिलेको अवस्थाको भिन्नताको बारेमा एउटा दार्शनिक, एउटा घतलाग्दो कुरा भन्नुभएको थियो – “मोहोरका ओहोरका भए, ओहोरका मोहोरका भए ।”
२०८४ मा हुने आम चुनाव ०८२ मा हुँदैछ । ओहोरका मोहोरका हुने र मोहोरका ओहोरका हुने चुनावमा परिणत होस् ।
उपरोक्त पार्टीका ओस्याहट र ओल्स्याहट कुराले देशका उत्पादनशिल युवा विदेश पलायन हुनबाट रोकिने छैनन् । देश जोगिने छैन । गजभरिको छाती बनाएर गर्वकासाथ राष्ट्रिय जनमोर्चाको गिलास चुनाव चिन्हमा मतदान गरौँ ।
– इन्द्रकान्त शर्मा
फलेवास भुसालचौर, पर्वत ।
