केर सिंह अदै,
तौलिहवा । नेपाल कम्युनिस्ट पार्टी (मसाल) का महामन्त्री मोहनविक्रम सिंहले साम्राज्यवादले नेपालमा आफ्नो अनुकूलको सरकार निर्माण गर्न लागेको बताउनु भएको छ । कपिलवस्तु जिल्लाको चार नम्बर जीतपुरमा राष्ट्रिय जनमोर्चाको जिल्ला स्तरीय प्रशिक्षण कार्यक्रमलाई सम्बोधन गर्दै सिंहले अहिलेको चुनावमा नेपाली जनताको प्रधान विरोधी पक्ष अमेरिकी साम्राज्यबाद भएको बताउनु भयो ।
‘धुन्दकारी डोनाल्ड ट्रम्पले संसार कब्जा गर्दै हिँडेको छ, उसले नेपालमा एमसिसी भित्रायर तिब्बत टुक्राउनका लागि नेपालमा प्रत्यक्ष उपस्थित हुन चाहिरहेको छ ।’ सिंहले भन्नुभयो– ‘त्यसका लागि साम्राज्यवादले नेपालमा आफ्नो अनुकूलको सरकार निर्माण गर्ने काममा सक्रिए रहेको छ ।’ नेपाली जनतालाई भ्रमित बनाएर नयाँ र वैकल्पिक राजनीतिक शक्तिको नाममा विभिन्न कठपुतली अराजनैतिक व्यक्तिहरूलाई साम्राज्यवादले उपयोग गरिरहेको सिंहले दावी गर्नुभयो ।
प्रशिक्षण कार्यक्रममा राष्ट्रिय जनमोर्चाका कार्यकारी अध्यक्ष रेश्मीराज नेपालीले जनता सचेत नभए देश अमेरिकी कब्जामा जाने बताउँदै अहिलेको प्रमुख मुद्दा राष्ट्रियता, गणतन्त्रको रक्षा, संघीयता खारेज नै रहेको बताउनु भयो ।
कार्यक्रममा समानुपातिक उम्मेदवार दधिराम आचार्य, कर्मराज चौधरी, रामकरण कुर्मी, प्रत्यक्ष उम्मेदार माधव भाट क्षेत्री, लक्ष्मी पोख्रेल, केरसिंह अदैले आ–आफ्नो परिचय दिई सम्पूर्ण कार्यकर्ता शुभचिन्तक एवं आम जनसमुदायलाई गिलास चिन्हमा मतदान गरी विजयी बनाउन अपील गर्नु भयो ।
कार्यक्रममा अखिल नेपाल किसान संघका केन्द्रीय उपाध्यक्ष शिव पौडेल, राष्ट्रिय जनमोर्चाका सल्लाहकार वासुदेव पोख्रेलको आतिथ्यता रहेको थियो ।
कार्यक्रमको अध्यक्षता राजमो जिल्ला अध्यक्ष राम प्रसाद बेल्बासे, सञ्चालन शशी सापकोटा र स्वागत पिताम्बर खनालले गर्नु भएको थियो ।
यसै गरी चार नम्बरमा कपिलवस्तु क्षेत्र न १ को चुनाव प्रचार प्रसार कार्यलय स्थापना गरिएको छ । राष्ट्रिय जनमोर्चा केन्द्रीय कार्यकारी अध्यक्ष रेश्मी राज नेपालीले रिबन काटेर कार्यलय उद्घाटन गर्नुभएको थियो ।
