खलङ्गा, प्युठान । राष्ट्रिय जनमोर्चा प्युठानले ऐरावती गाउँपालिकामा राष्ट्रिय जनमोर्चाले आयोजना गरेको चुनावी भेला उत्साहपूर्ण सहभागिताका साथ सम्पन्न भएको छ ।
आज माघ २३ गते बरौँला भेलामा सम्पन्न स्थानीय जनता उल्लेख्य रूपमा उपस्थित भई राजमोप्रति बढ्दो समर्थन प्रकट गरेका थिए ।
कार्यक्रममा नेकपा (मसाल) का महामन्त्री मोहन विक्रम सिंह प्रमुख वक्ताका रूपमा सहभागी हुनुहुन्थ्यो । उहाँले सम्बोधनका क्रममा वर्तमान राजनीतिक अवस्था, राष्ट्रियता, जनजीविकाका मुद्दा तथा राजमोको राजनीतिक धारबारे स्पष्ट धारणा राख्दै मतदातालाई सचेत र जिम्मेवार निर्णय गर्न आग्रह गर्नुभएको थियो ।
त्यस्तै, प्युठानबाट राष्ट्रिय जनमोर्चाका उम्मेदवार तिलक जिसीले पनि आफ्नो प्रतिबद्धता व्यक्त गर्दै जिल्लाको विकास, रोजगारी सिर्जना, सुशासन र जनताको दैनिक समस्याको समाधानलाई प्राथमिकतामा राख्ने बताउनुभयो । उहाँले आफू जनताको बिच मै रहेर काम गर्ने प्रतिबद्धता जनाउनुभयो ।
भेलामा सहभागी स्थानीयहरूले राजमोले उठाउँदै आएका मुद्दा जनभावनासँग नजिक रहेको प्रतिक्रिया दिएका थिए । कार्यक्रमले ऐरावती क्षेत्रको चुनावी माहोल थप तातेको संकेत दिएको छ ।
राजमोले प्युठानका विभिन्न स्थानमा चुनावी अभियानलाई तीव्र बनाउँदै लगेको जनाएको छ ।
