खलङ्गा, प्युठान । नेपाल कम्युनिस्ट पार्टी (मसाल) का महामन्त्री मोहनविक्रम सिंहले अमेरिकी साम्राज्यवादको प्रत्यक्ष हस्तक्षेपका कारण देश अप्ठ्यारोमा परेको बताउनु भएको छ ।
पुन्यखोलामा बुधबार माघ २२ गते सम्पन्न राष्ट्रिय जनमोर्चा प्युठान नगरपालिका कार्यकर्ता भेलालाई सम्बोधन गर्दै सिंहले अमेरिकाको नीति चीनलाई घेर्ने उदेश्य रहेको बताउनु भयो । दुई देशको लडाइँमा नेपाल अछुतो रहन नसक्ने सिंहको भनाई थियो ।
‘नेपालको भूमि प्रयोग नगरिकन अर्को बाटो छैन ।’ सिंहले अगाडि भन्नुभयो– ‘त्यसैले नेपाललाई युद्ध मैदान गराउने रणनीति अनुसार अमेरिकाले नयाँ र वैकल्पिक भनिएका राजनीतिक दललाई उपायो गरेको छ ।’
राष्ट्रिय जनमोर्चा लुम्बिनी प्रदेशका सल्लाहकार शुरेस थापाले प्युठानमा काँग्रेसका उम्मेद्वार अमेरिकाको बारबारा फाउन्डेसनका केन्द्रीय सदस्य हुनु प्युठानको लागि मात्रै नभएर सिंगो देशको लागि दुर्भाग्यपूर्ण रहेको बताउनुभयो ।
थापाले एमालेका उम्मेद्वार, घण्टि पार्टीको उम्मेद्वारबाट प्युठान जिल्ला अगाडि बढ्न नसक्ने दाबी गर्दै राष्ट्रिय जनमोर्चाका उम्मेद्वार तिलक जिसीले जित्न आवश्यक रहेको उल्लेख गर्नुभयो।
राष्ट्रिय जनमोर्चाका तर्फबाट प्रतिनिधिसभाका लागि उम्मेद्वार तिलक जिसीले राष्ट्र राष्टियता जोगाउन, समग्र प्युठानको बिकास निर्माणका लागि आफुलाई मतदान गरि विजयी बनाउनु अपिल गर्नु भयो ।
कार्यक्रममा अखिल नेपाल महिला संघका केन्द्रीय उपाध्यक्ष पद्मा पण्डित, नेकपा मसालका जिल्ला प्रवक्ता राम पहाडी, समानुपातिक उम्मेद्वार लक्ष्मी परियार, प्रगतिशील पत्रकार संघका केन्द्रीय सदस्य जुमान सिंह केसी, अखिल छैठौँका जिल्ला सदस्य माया घर्ती लगायतको आतिथ्यता एवं मन्तव्य रहेको थियो ।
कार्यक्रमको अध्यक्षता नगरपालिका पार्टी अध्यक्ष धुर्व थापाले र सञ्चालन लाल बहादुर रावतले गर्नुभएको थियोे ।
प्युठान नगरपालिकाका सबै वडाबाट प्रतिनिधिमुलक अगुवा कार्यकर्ताहरूको सक्रिय सहभागिता रहेको सो भेलाले नगर अध्यक्ष धुर्व थापाको संयोजकत्वमा ७९ सदस्यीय चुनाब प्रचारप्रसार समिति गाठन गरेको छ ।
