काठमाडौँ । राष्ट्रिय जनमोर्चाका केन्द्रीय सल्लाहकार आनन्द शर्माले जनताले नै देश बचाउन सक्छन् भन्ने मनसायका साथ आफ्नो पार्टी आमचुनावमा भाग लिएको दाबी गर्नुभएको छ ।
राजमो काठमाडौँद्वारा २०८२ माघ १७ गते शनिबार आयोजित निर्वाचनकेन्द्रित भेलालाई सम्बोधन गर्दै उहाँले सो अभिव्यक्ति दिनुभएको हो ।
देशमा गणतन्त्र र धर्मनिरपेक्षतासँगै राष्ट्रियतासमेत गम्भीर अवस्थामा पुगेको उहाँको भनाइ थियो ।
‘देश भावी पिँढीलाई यथास्थितिमा बुझाउन सक्छौँ कि सक्दैनौँ भन्ने धरमरमाझ चुनाव हुन गइरहेको छ’ उहाँले भन्नुभयो– ‘हामी नेपाली जनताले नै देश बचाउन सक्छन् भन्ने मनसायका साथ चुनावमा भाग लिइरहेका छौँ ।’
देशमा साम्राज्यवादी हस्तक्षेप बढ्दै गइरहेको बताउँदै उहाँले जनताको सङ्घर्षको बलमा मात्रै देशको राष्ट्रियता, सार्वभौमिकता र भौगोलिक अखण्डता बचाउन सकिने अवस्था रहेको बताउनुभयो ।
गणतन्त्र र भ्रष्टाचार
फरक प्रसङ्गमा उहाँले गणतन्त्रलाई भ्रष्टाचारसँग जोडेर बद्नाम गर्ने प्रयास भइरहेको बताउनुभयो ।
‘कतिपयले गणतन्त्र र भ्रष्टाचारलाई एकार्काको पर्यायवाची बताइरहेका छन्’ उहाँले भन्नुभयो– ‘तर गणतन्त्र रहेन भने देश दशकौँ पछि जानेछ र प्रतिगामी व्यवस्था कायम हुनेछ ।’
भ्रष्टाचार देशको गम्भीर रोग भएको बताउँदै उहाँले त्यसलाई उन्मूलन गरेर मात्रै गणतन्त्रको संस्थागत विकास हुन सक्ने धारणा राख्नुभयो ।
मन्तव्यको क्रममा उहाँले राजमो मात्रै निष्कलङ्क पार्टी रहेको दाबी गर्नुभयो ।
उहाँले भन्नुभयो– ‘यदि देशमा भ्रष्टाचारसँग कतै पनि नजोडिएको कुनै पार्टी छ भने त्यो राष्ट्रिय जनमोर्चा मात्रै हो ।’
२०५१ सालदेखि लगातार संसद्मा रहेर राजमोका कुनै पनि प्रतिनिधि भ्रष्टाचारमा नजोडिएको उहाँको भनाइ थियो ।
‘नेकपा (मसाल) र राष्ट्रिय जनमोर्चाले सही र क्रान्तिकारी राजनीति बोकेकै कारण यसका जनप्रतिनिधि भ्रष्टाचारबाट अछुतो रहन सकेका हुन्’ उहाँको भनाइ थियो ।
जेनजीको नाममा विध्वंस
मन्तव्यको क्रममा नेता शर्माले जेनजीको नाममा इतिहासमै नगरिएको विध्वंस गत भदौ २४ गते भएको ठहर उहाँको थियो ।
रुसको उदाहरण दिँदै उहाँले भन्नुभयो– ‘अक्टोबर क्रान्तिका बेला बोल्सेभिकले क्रेमलिन दरबार ध्वस्त गर्न सक्दथे तर लेनिन र त्यहाँका कम्युनिस्ट पार्टीको सही नीतिका कारण त्यसो गरिएन ।’
उहाँले २००७ सालको राजनीतिक परिवर्तनमा, २०४६ सालको राजनीतिक परिवर्तनमा र दश वर्षे माओवादी युद्धको बेलामा समेत अहिलेको जस्तो ध्वंस नभएको धारणा व्यक्त गर्नुभयो ।
जेनजीको सही मागलाई साम्राज्यवादीले हाइज्याक गरेकै कारण उक्त विध्वंस भएको र त्यसको फलस्वरूप संवैधानिक रूपमा संसदबाहिरबाट प्रधानमन्त्री गठन तथा संसद् विघटन भएको उहाँले स्पष्ट पार्नुभयो ।
उहाँले जेनजी घटनाका लागि दोषीमाथि निष्पक्ष छानबिन गरेर दोषीउपर कारबाही गरिनुपर्ने आवश्यकतामा जोड दिनुभयो ।
