माघ–१६,अर्घाखाँची । अखिल नेपाल युवक संघ अर्घाखाँचीको आठौं जिल्ला सम्मेलन धारापानीमा सम्पन्न भएको छ । सम्मेलनले रेशम वि.क.को नेतृत्वमा २७ सदस्यिय जिल्ला समितिको गठन गरेको छ ।
नवगठित समितिको उपाध्यक्षमा शुरेस आचार्य, सचिवमा झविन्द्र चुँदाली, सह–सचीवमा रिता बन्जाडे पुन र कोषाध्यक्षमा भुपाल वि.सी. निर्वाचित हुनुभएको छ । सम्मेलनले माधव बन्जाडे र महेश बुढामगरलाई सचिवालयमा चयन गरेको छ । सम्मेलनको उद्घाटन संघका केन्द्रीय अध्यक्ष गाणेश अधिकारीले गर्नुभएको थियो ।
सम्मेलनलाई सम्बोधन गर्दै केन्द्रीय अध्यक्ष अधिकारीले नेपालमा युवालाई भाडाको खेतला बनाइएको आरोप लगाउनुभयो । बेरोजगार उत्पादन गर्ने शिक्षा, विदेश पलायन बनाउने राज्यको नीति र विदेशीका एजेन्टले समेत भर्याङ्ग बनाएर युवाशक्तिको दुरुपयोग गर्ने प्रवृति बढेको अधिकारीको आरोप छ ।
‘नयाँ र वैकल्पिक शक्तिको नाममा देश बेच्ने षडयन्त्र भइरहेको छ ।’ अधिकारीले भने– ‘सेचत र देशभक्त युवाहरूको एकताको खाँचो छ ।’ देशको राष्ट्रियता, स्वतन्त्रता, स्वाधिनता र गणतन्त्रको रक्षाका लागि युवाहरूले राजनीतिलाई ठिकसँग बुझ्नु पर्नेमा अधिकारीले जोड दिए ।
‘राजनीतिलाई समाजसेवा भन्दा पनि कमाई गर्ने साधन बनाउँदा देश संकटमा परेकोले यसको भण्डाफोर गर्न युवाहरू एक जुट हुनुपर्ने आवश्यकता छ ।’ अध्यक्ष अधिकारीले भने– ‘सत्तासँग राष्ट्रियता साट्ने राजनीतिक प्रवृतिका बिरुद्ध सम्झौताहिन संघर्ष गर्दै यसपालि देशैभर राजमोका उम्मेद्धारलाई मतदान गरि जिताउनुको विकल्प छैन ।’
कार्यक्रममा राष्ट्रिय जनमोर्चाका नेता शेर बहादुर वि.सी., सागर के.सी., जिल्ला अध्यक्ष थम्मन के.सी., राजमो अर्घाखाँचीको तर्फबाट प्रतिनिधि सभा सदस्यका उम्मेद्धार पशुपति ढकाल, जिल्ला सचिवालय सदस्य भिमलाल आचार्य, अखिल नेपाल युवक संघका केन्द्रीय कोषाध्यक्ष कमल पौडेल, सचिव ठाकुर पन्थी, अनेमसंघ नेतृ कल्पना पोख्रेल लगायतले मन्तव्य दिनुभएको थियो ।
जिल्लाका ६ वटै पालिकाबाट प्रतिनिधिहरूको सहभागीतामा सम्पन्न सम्मेलनमा राजमोका विभिन्न तहका नेताहरूको समेत सहभागिता रहेको थियो ।
