भीमदत्तनगर । दर्जन नवप्रवेशीको प्रवेशसँगै कञ्चनपुरमा राष्ट्रिय जनमोर्चाको चुनावी भेला सम्पन्न भएको छ ।
महासचिव मनोज भट्टको प्रमुख आतिथ्यमा २०८२ माघ १६ गते शुक्रबार शुक्लाफाटा–१२ कालागौडीमा सो कार्यक्रम सम्पन्न भएको हो ।
प्रमुख अतिथि भट्टको हातबाट राजमोको सदस्यता लिनेहरूमा राधा विष्ट, बिस्ना विष्ट, चन्द्रा विष्ट, सम्झना विष्ट, राजेन्द्र धानुक, कर्ण कार्की, महादेव कार्की, नैनसिंह कार्कीलगायत हुनुहुन्छ ।
आजै सहिद दिवस परेकोमा कार्यक्रमको प्रारम्भमा सहिदको सम्मानमा दुई मिनट मौनधारण गरिएको थियो ।
त्यसलगत्तै मन्तव्य राख्दै महासचिव भट्टले सत्तामा रहेका पुराना दलले काम नगरेको सत्य भए पनि नयाँ भनिएका शक्तिहरूसित राजनीतिक दृष्टिकोण नभएको बताउनुभयो ।
मन्तव्यको क्रममा उहाँले पुराना दलको विकल्प घण्टीपार्टी हुन नसक्ने बताउनुभयो ।
यस सन्दर्भमा उहाँले नयाँ भनिएका पार्टीका नेतृत्व सत्तामा पुग्नुभन्दा पहिले नै गैरकानुनी काममा व्यस्त भएको तथ्य जगजाहेर रहेको स्पष्ट पार्नुभयो ।
महासचिव भट्टले भन्नुभयो– ‘पुराना पार्टीको विकल्प घण्टीपार्टी होइन बरु राष्ट्रिय जनमोर्चा हो, जोसँग स्पष्ट राजनीतिक दृष्टिकोण र निष्कलङ्क नेतृत्व पनि ।’
उहाँले मतदानको बेलामा जनताले सही पार्टी र उम्मेदवार चिन्नुपर्ने आवश्यकतामा जोड दिनुभयो ।
राजमो सुदूरपश्चिम प्रदेश समितिका सदस्य जनक कुँवरको सञ्चालनमा अघि बढेको उक्त कार्यक्रमको अध्यक्षता राजमो कञ्चनपुरका जिल्ला सदस्य टुङ्गे बोहराले गर्नुभएको थियो ।
कार्यक्रममा स्वागत मन्तव्य अर्का जिल्ला सदस्य प्रमानन्द कडायतले राख्नुभएको थियो ।
भेलाले रामबहादुर कार्कीको नेतृत्वमा ११ सदस्यीय निर्वाचन परिचालन मूल समिति, प्रमानन्द कडायतको नेतृत्वमा एक सय ५५ सदस्यीय निर्वाचन प्रचारप्रसार समिति र जनक कुँवरको नेतृत्वमा नौ सदस्यीय आर्थिक समिति गठन गरेको छ ।
त्यस्तै भेलाले कञ्चनपुरको क्षेत्र नं. १ का ३१ वडा, क्षेत्र नं. २ का ३१ वडा र क्षेत्र नं. ३ का ३० वडामा उम्मेदवारसहितको घरदैलो, भेटघाट, कोणसभा, मोटरसाइकल र्यालीको कार्यक्रम निश्चित गरिएको आयोजकले जानकारी दिएको छ ।
कार्यक्रमअन्तर्गत भोलि शनिबार भीमदत्तनगरको मदनचोकमा कोणसभा सम्पन्न गरिने भएको छ । महासचिव मनोज भट्ट तथा उम्मेदवारको उपस्थितिमा सम्पन्न गरिने सो कार्यक्रमपूर्व मोटरसाइकिल र्याली सम्पन्न गरिने भएको छ ।
