प्युठान । राष्ट्रिय जनमोर्चा प्युठानले जिल्ला स्तरीय अगुवा कार्यकर्ता भेला सम्पन्न पारेको छ । उत्साहजनक रूपमा सम्पन्न भेलामा जिल्लाका विभिन्न स्थानबाट आएका अगुवा कार्यकर्ताहरूको उल्लेखनीय सहभागिता रहेको थियो ।

माघ १५ गते जिल्ला सदरमुकाम खलङ्गामा सम्पन्न सो भेलामा नेकपा (मसाल) का महामन्त्री का. मोहनविक्रम सिंहको प्रमुख आतिथ्यता रहेको थियो ।

त्यस्तै राष्ट्रिय जनमोर्चाका केन्द्रीय सदस्य कृष्णबहादुर खड्का, लुम्बिनी प्रदेश अध्यक्ष का. बोमबहादुर खत्री, लुम्बिनी प्रदेश सल्लाहकार का. सुरेश थापा लगायतका नेताहरूको आतिथ्यता रहेको थियो । विभिन्न जनवर्गीय मोर्चाबाट पनि अतिथि आसन ग्रहरण गराइएको सो भेलामा नेताहरूले वर्तमान राजनीतिक परिस्थिती, राष्ट्रियता, जनताको अधिकार र आगामी निर्वाचनमा राष्ट्रिय जनमोर्चाको भूमिकाबारे धारणा राख्नुभएको थियो ।

भेलाले ज्ञामुराम न्यौँपानेको संयोजकत्वमा ५५५ सदस्यीय जिल्ला निर्वाचन प्रचार–प्रसार समिति गठन गरेको छ । गठन गरिएको समितिले आगामी निर्वाचनलाई केन्द्रमा राखी पार्टीका नीति, कार्यक्रम र उम्मेदवारको पक्षमा व्यापक जनसम्पर्क अभियान सञ्चालन गर्ने निर्णय गरेको छ ।

भेलामा प्युठानबाट प्रतिनिधिसभा सदस्य उम्मेदवार कामरेड तिलक जीसीले आफ्‌नो उम्मेदवारीबारे उपस्थित कार्यकर्ताहरूलाई स्पष्ट पार्दै जनताको पक्षमा संघर्ष गर्ने प्रतिबद्धता व्यक्त गर्नुभएको थियो । उहाँले कार्यकर्ताहरूलाई एकताबद्ध भई चुनाव प्रचार प्रसार अभियानमा सक्रिय रूपमा लाग्न आग्रह गर्नुभयो ।