काठमाडौँ । नेपाली कङ्ग्रेसका निवर्तमान सांसदहरू संसद् पुन:स्थापना रिटको सम्बन्धमा पेसी तोक्ने मागसहित सर्वोच्च अदालत जाने भएका छन् ।
काठमाडौँमा उपलब्ध निवर्तमान सांसदसहित आफूहरू अदालत जान लागेको संसदीय दलका प्रमुख सचेतक श्याम घिमिरेले जानकारी दिए ।
‘अदालतमा धेरै रिट परेका छन् तर अहिलेसम्म कुनै पेसी तोकेको छैन । त्यसैले हामी ध्यानाकर्षण गराउनको लागि अदालत जान लागेका हौँ । चुनावअघि नै फैसला हुनुपर्छ भन्ने हाम्रो माग रहन्छ’ घिमिरेले भनेका छन् ।
न्याय मरेको छैन भन्ने सन्देश अदालतले दिनका लागि पनि अदालतको फैसला आउनुपर्ने उनको भनाइ थियो ।
उनले अगाडि भने– ‘हामीले काठमाडौँमा उपलब्ध साथीहरूलाई भनेका छौँ, कोही चुनावी अभियान लिएर जिल्ला जानुभएको छ । हामी जे फैसला आएपनि मान्छौँ तर अदालतले चुनावअघि नै फैसला गर्नुपर्छ भन्ने हाम्रो माग हो ।’
एमालेसँग पनि सँगै जानेबारे छलफल गरेको भए पनि जाने/नजाने भन्ने जबाफ पाइनसकेको उनले बताए ।
जेनजी आन्दोलनपछि प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले गत भदौ २७ गते संसद् विघटन गरेका थिए । संसद् विघटनपछि फागुन २१ गते निर्वाचन हुँदैछ ।
केही दिनयता कतिपय मिडियामा माघ २० गते प्रतिनिधिसभा पुन:स्थापनासम्बन्धी फैसला आउने हल्ला फैलिएको थियो ।
