काठमाडौँ । नेकपा (मसाल) का महामन्त्री मोहनविक्रम सिंहले विभिन्न मतभेदका बाबजुद राष्ट्रियताको पक्षमा वामपन्थी एकता कायम हुनु नेपाली राजनीतिको सकारात्मक पक्ष रहेको धारणा व्यक्त गर्नुभएको छ ।
पाँच वामपन्थी दलद्वारा २०८२ माघ ११ गते आइतबार नेपाल प्रज्ञा–प्रतिष्ठानको सिद्धिचरण कक्षमा आयोजित अन्तरसंवाद कार्यक्रममा सङ्क्षिप्त मन्तव्य राख्दै उहाँले सो दाबी गर्नुभएको हो ।
‘राष्ट्रियताको पक्षमा नेपालमा वामपन्थी दलहरू एक ठाउँमा हुन्छन् । यो नेपाली राजनीतिको सकारात्मक पक्ष हो’ उहाँले भन्नुभयो ।
आपसमा विभिन्न मतभेद हुनुका बाबजुद राष्ट्रियताको पक्षमा सहकार्य गर्नु लेनिन, स्टालिन र माओको संयुक्त मोर्चासम्बन्धी अभ्यास भएको उहाँले बताउनुभयो ।
‘हामीमाझ विभिन्न मतभेद छन् । तिनीहरूका लागि बेलाबेलामा हामीमाझ छलफल चलिरहन्छ’ उहाँले भन्नुभयो– ‘ती मतभेदका बाबजुद राष्ट्रियता रक्षाको सवालमा हामी एक ठाउँमा हुने गरेका छौँ । यो लेनिन, स्टालिन, माओले अपनाउने गरेको संयुक्त मोर्चाको सिद्धान्तअनुरूप छ ।’
महामन्त्री सिंहले अमेरिकी साम्राज्यवादका कारणले विश्वशान्तिमा गम्भीर आघात पुगेको र त्यसले गर्दा तेस्रो विश्वयुद्धको सम्भावना नजिकिँदै गइरहेको पनि बताउनुभयो ।
उहाँले भन्नुभयो– ‘अमेरिकी राष्ट्रपति ट्रम्पका कारणले संसार तेस्रो विश्वयुद्धतर्फ गइरहेको छ । यो पनि निश्चित छ, अबको विश्वयुद्ध आणविक प्रकृतिको हुनेछ । त्यसको फलस्वरूप मानव समाज नै समाप्त हुन सक्नेछ ।’
नेपालमा चीन विरुद्ध दलाई लामालाई समर्थन गर्दैै अमेरिकी हस्तक्षेप अगाडि बढेको उहाँको धारणा थियो ।
सिंहले भन्नुभयो– ‘नेपालको राष्ट्रियता, सार्वभौमिकता र भौगोलिक अखण्डताको रक्षाका लागि अमेरिकी साम्राज्यवादको विरुद्ध लड्नु आवश्यक छ ।’
भेनेजुयलामाथिको अमेरिकी हस्तक्षेप विशुद्ध राष्ट्रिय घटना नभएको स्पष्ट पार्दै उहाँले त्यसबाट नेपालले पनि गम्भीर पाठ सिक्नुपर्ने उहाँको थप धारणा थियो ।
‘अमेरिकाले भेनेजुयलाका राष्ट्रपति निकोलस मदुरोलाई गिरफ्तार गरेर अमेरिका पुर्याउने घटना त्यो देशको मात्रै होइन’ उहाँले भन्नुभयो– ‘यो विश्वभरिका उत्पीडित देश, जनता र विश्वशान्तिको लागि खतरा हो ।’
उहाँले अहिले संसारभरि नै अमेरिकी साम्राज्यवादको विरोधमा आवाज उठिरहेकोमा यस्तो विरोधले साम्राज्यवादलाई रोक्न सक्ने विश्वास व्यक्त गर्नुभयो ।
महामन्त्री सिंहले यस खालका कार्यक्रमको अन्तर्राष्ट्रिय महत्त्व रहेकोसमेत बताउनुभयो ।
नेपाली कम्युनिस्ट पार्टीका नेता लीलामणि पोखरेलको सञ्चालनमा अघि बढेको उक्त कार्यक्रममा राष्ट्रिय जनमोर्चाका कावा अध्यक्ष रश्मिराज नेपाली, राजमो उपाध्यक्ष तथा प्रवक्ता दुर्गा पौडेल, अखिल (छैठौं) का अध्यक्ष सुवास जिसी, नेकपा (माले) का महासचिव सी.पी. मैनाली र परराष्ट्रविद हिरण्यलाल श्रेष्ठको विचार राख्नुभएको थियो ।
त्यस्तै, कार्यक्रममा लोककृष्ण भट्टराई, महेश मास्के, टङ्क कार्की, बलराम बासकोटा, सीताराम तामाङ, विष्णुपुकार श्रेष्ठ, प्रेमलकुमार खनाल, राजुला जोशी, पुष्कर गौतम, सावित्रा गौतम, खगेन्द्र सिटौला, खेम कोइराला, युवराज पन्थी, नहेन्द्र खड्कालगायतले पनि विचार व्यक्त गर्नुभएको थियो ।
कार्यक्रममा दुर्गालाल अधिकारीले साम्राज्यवाद विरोधी गीत गाउनुभएको थियो ।
भेनेजयुलाको सार्वभौमिकतामाथि अमेरिक हस्तक्षेप विरुद्ध अन्तरसंवाद भनिएको सो कार्यक्रमको आयोजना नेकपा (मसाल), नेपाली कम्युनिस्ट पार्टी, नेकपा (माले), नेकपा (संयुक्त) र राष्ट्रिय जनमोर्चाले गरेका थिए ।
