राम चौधरी

निर्वाचन क्षेत्र दाङ–१ का सम्पूर्ण सचेत नागरिकहरू, किसान, मजदुर, श्रमिक, युवा, बुद्धिजीवी तथा परिवर्तनका पक्षधर आम जनसमुदायलाई प्रवासको माटोबाट हार्दिक शुभकामना र क्रान्तिकारी अभिवादन ।

म आज यो सन्देश कुनै व्यक्तिगत स्वार्थ, पद वा पहुँचको आकांक्षाबाट होइन, विदेशी भूमिमा पसिना बगाउँदै जीवन निर्वाह गरिरहेको एक साधारण प्रवासी श्रमिकको हैसियतबाट लेख्दैछु ।

सुरुमा मलाई राजनीतिप्रति कुनै चासो थिएन, तर जब आफ्नो परिवार र भविष्यको चिन्ताले प्रदेश लाग्न बाध्य भएँ, त्यहीँ मैले श्रमिक जीवनको वास्तविकता नजिकबाट भोगेँ । लामो कामको समय, असुरक्षित अवस्था, अपमान र अन्याय र समस्या पर्दा कसैले नसुन्ने पीडा । यी सबै अनुभवहरूले मलाई बुझाए—गरिब र श्रमिकको समस्या एक्लैले समाधान हुँदैन । संगठन, विचार र सिद्धान्तमा आधारित राजनीति अत्यावश्यक हुन्छ ।

प्रवासमा श्रमिकहरूको हक–अधिकारका लागि संगठनमा आबद्ध हुँदै जाँदा मैले राजनीति बुझ्न थालेँ । त्यसपछि स्पष्ट भयो— राजनीति सत्ता र कुर्सीको खेल होइन, यो त गरिब, किसान, मजदुर र मेहनतकश वर्गको पक्षमा उभिने निरन्तर संघर्षको नाम हो ।

यही संघर्षको स्पष्ट विचार र सैद्धान्तिक धरातल बोकेको पार्टी हो राष्ट्रिय जनमोर्चा । यो पार्टीले सम्झौतावादी र अवसरवादी राजनीतिबाट टाढा रहे राष्ट्रियताको रक्षा, लोकतन्त्रको सुदृढीकरण र श्रमिक–किसानको अधिकारका लागि निरन्तर रूपमा संघर्ष गर्दै आएको छ ।

निर्वाचन क्षेत्र दाङ–१ मा राष्ट्रिय जनमोर्चाका उमेदवार गणेश आचार्य यही सिद्धान्तनिष्ठ राजनीतिका प्रतिनिधि हुनुहुन्छ । उहाँ कुनै सत्ताको लोभमा राजनीति गर्ने नेता होइन, जनताको दुःख–सुखसँग जोडिएको, इमान्दार, स्पष्ट विचार बोकेको र जनताको पक्षमा अडान लिने नेता हुनुहुन्छ ।

माक्र्सले भनेका छन्– ‘श्रम गर्ने वर्ग आफैँ आफ्नो मुक्तिको कर्ता हो ।’ आज दाङ–१ का किसान, मजदुर र श्रमिक जनताले आफ्नै वर्गको पक्षमा उभिने प्रतिनिधि रोज्ने अवसर पाएका छन् । गणेश आचार्यलाई विजयी गराउनु भनेको संसदमा श्रमिक–किसानको आवाज, भ्रष्टाचार विरुद्धको निर्भिक स्वर र सैद्धान्तिक राजनीतिलाई प्रवेश गराउनु हो ।

यो निर्वाचन केवल व्यक्ति जिताउने प्रक्रिया होइन । यो शोषण, अन्याय, भ्रष्टाचार र जनविरोधी नीतिविरुद्ध सिद्धान्तनिष्ठ राजनीतिलाई जिताउने ऐतिहासिक संघर्ष हो । प्रवासमा रहेका हामी नेपालीहरूले देशको अर्थतन्त्र धानेका छौँ । हाम्रो पसिनाले देश चलेको छ ।

त्यसैले देशको राजनीति कसको हातमा जाने भन्ने सवालमा हामी मौन बस्न सक्दैनौँ । हामी चाहन्छौँ, राष्ट्रियतामा अडिग, भ्रष्टाचारविरुद्ध कठोर र गरिब, किसान र श्रमिकको पक्षमा नझुक्ने राजनीतिका लागि राष्ट्रिय जनमोर्चाको उमेदवार गणेश आचार्य सबैभन्दा भरोसायोग्य निर्विकल्प हुन् ।

दाङ–१ का जनताले यसपटक राष्ट्रिय जनमोर्चाका उमेदवार गणेश आचार्यलाई मतदान गरेर विचार जिताउने, सिद्धान्त जिताउने र जनताको पक्षको राजनीतिलाई बलियो बनाउनु हुनेछ भन्ने दृढ विश्वास व्यक्त गर्दछु । एकता बिना शक्ति हुँदैन, संगठन बिना संघर्ष सफल हुँदैन र सिद्धान्त बिना राजनीति दिशाहीन हुन्छ।

यही विश्वासका साथ निर्वाचन क्षेत्र दाङ–१ मा राष्ट्रिय जनमोर्चाका उमेदवार गणेश आचार्यको शानदार विजयको कामना गर्दै सम्पूर्ण दाङ– १ वासीहरूलाई हार्दिक चुनावी शुभकामना ।