सुर्खेत । राष्ट्रिय जनमोर्चाले आगामी प्रतिनिधिसभा निर्वाचनका लागि सुर्खेत जिल्लाका तीन निर्वाचन क्षेत्रमध्ये दुई क्षेत्रबाट उम्मेदवार मनोनयन दर्ता गरेको छ ।
प्राप्त जानकारी अनुसार निर्वाचन क्षेत्र नम्बर १ बाट मोहन थापा र निर्वाचन क्षेत्र नम्बर २ बाट पूर्णबहादुर शाहीले उम्मेदवार मनोनयन दर्ता गरेका छन् ।
निर्वाचन क्षेत्र नम्बर १ बाट उम्मेदवारी दर्ता गराएका मोहन थापा लामो समयदेखि राष्ट्रिय जनमोर्चाको जिल्ला अध्यक्षको जिम्मेवारी निर्वाह गर्दै आएका कुशल संगठक हुन् । उनले लामो समयसम्म सुर्खेत जिल्लाको शान्ति समितिको नेतृत्व गर्ने व्यक्तिका रूपमा पनि परिचित छन् । थापाको नेतृत्वकाल विवादरहित, समन्वयात्मक र प्रभावकारी रहेको बताइन्छ ।
त्यसैगरी निर्वाचन क्षेत्र नम्बर २ का उम्मेदवार पूर्णबहादुर शाही सेवानिवृत्त शिक्षक हुन् । सेवाकाल पूरा गरी निवृत्त भएपछि पनि शाही निरन्तर राष्ट्रिय जनमोर्चाको सांगठनिक अभियानमा सक्रिय रहँदै आएका छन्् ।
सशस्त्र द्वन्द्वका क्रममा राज्य पक्ष र विद्रोही पक्ष दुबैको दोहोरो मारमा परेर पटक–पटक शारीरिक तथा मानसिक यातनाका शिकार बनेका शाही जनसंघर्षबाट खारिएका नेता मानिन्छन् । शाही पहिलो पटक संसदीय निर्वाचनमा सहभागी हुँदै छन् ।
