डोटी । आउँदो फागुन २१ गते सम्पन्न हुने प्रतिनिधिसभा निर्वाचन अन्तर्गत प्रत्यक्षतर्फ डोटी जिल्लाबाट राष्ट्रिय जनमोर्चाका महासचिव मनोज भट्ट उम्मेदवारका रूपमा सिफारिस हुनुभएको छ ।
पार्टीभित्र वैचारिक र बौद्धिक क्षमताका कारण परिचित भट्टको उम्मेदवारी सिफारिसलाई डोटी जिल्लाभर सकारात्मक रूपमा हेरिएको छ ।
राष्ट्रिय जनमोर्चाले डोटी जिल्लामा जनपक्षीय राजनीति, सुशासन, सामाजिक न्याय र राष्ट्रिय स्वाधीनताको सवाललाई सधैँ प्राथमिकतामा राख्दै आएको छ । सोही राजनीतिक धाराको प्रतिनिधित्व गर्ने व्यक्तित्वका रूपमा महासचिव भट्टको उम्मेदवारी सिफारिस हुनु पार्टीका लागि मात्र होइन, सिंगो डोटी जिल्लाका सचेत नागरिकहरूका लागि पनि महत्वपूर्ण अवसरका रूपमा लिइएको छ ।
महासचिव भट्ट लामो समयदेखि राष्ट्रिय जनमोर्चाको संगठन निर्माण, वैचारिक प्रशिक्षण र लोकतान्त्रिक आन्दोलनमा सक्रिय रहँदै आउनु भएको छ । उहाँले शिक्षा, स्वास्थ्य, रोजगारी, कृषकका समस्या, भ्रष्टाचारविरुद्धको संघर्ष तथा संघीयताको विकृतिप्रति निरन्तर आवाज उठाउँदै आउनु भएको छ ।
