काठमाडौं । नेपाली काँग्रेसका महामन्त्रीद्वय गगनकुमार थापा र विश्वप्रकाश शर्मालाई पार्टी संस्थापन पक्षले कारबाही गरेको छ । त्यसका साथै सहमहामन्त्री फरमुल्ला मन्सुरलाई पनि निष्काशन गरेको छ ।
पार्टी विभाजन रोक्न भन्दै विभिन्न चरणमा नेताहरू छलफलमा बसेका थिए । मंगलबार नेताहरूले तीन चरणमा छलफल गरेका थिए । बुधबार विहानमात्रै महामन्त्रीद्वयले सभापति शेरबहादुर देउवासँग छलफल गरेका थिए । उक्त छलफलले पनि निकास निकाल्न सकेन । विशेष पक्षका महामन्त्रीद्वयले निर्वाचन समितिलाई कारबाही अघि बढाउन निर्देशन दिए ।
पार्टी निर्णयविपरीत विशेष महाधिवेशन आह्वान गरेको भन्दै उनीहरूमाथि कारबाही गरिएको बताइएको छ । पार्टीको ५४ प्रतिशत महाधिवेशन प्रतिनिधिले माग गरेको विशेष महाधिवेशनलाई बेवास्ता गरिएको भन्दै महामन्त्रीद्वयले आह्वान गरेका थिए । तर, थापा र शर्मा सहभागी केन्द्रीय समितिको बैठकले नै पार्टीको नियमित महाधिवेशन पुसमा सम्भव नभएपछि वैशाखमा गर्ने सहमति गरेको थियो । उनीहरूले उक्त निर्णयमा फरक मत राखेका थिए ।
विशेष महाधिवेशन आह्वान गरेका थापा र शर्माले बन्द सत्रको हलले गरेको निर्णय नै अन्तिम निर्णय हुने भन्दै निर्वाचन समिति गठन गरी चुनावी प्रक्रिया अघि बढाएका थिए । सोहीअनुसार सभापति पदमा गगन थापाको नाम दर्ता गरिएको छ । निर्वाचन समितिले अन्य पदाधिकारीमा पनि मनोनयन भइसकेको बताएका छन् । यसैसँगै नेपाल काँग्रेसमा करिब करिब फूटका संघारमा पुगेको छ ।
पार्टी केन्द्रीय कार्यालय सानेपामा पुस २९ र ३० गते दुई दिनसम्म चलेको केन्द्रीय कार्यसमितिको बैठकले गगन–विश्वसहित फरमुल्ला मन्सुरलाई निष्काशित गर्ने निर्णय गरेको हो ।
उक्त बैठकले विधानको २०१७ (३४) को क, ख, ग र (ङ)मा व्यवस्था रहे अनुसार महामन्त्री द्वय थापा–शर्मा र सहमहामन्त्री सन्सुरलाई काँग्रेसको साधारण सदस्य समेत नरहने गरी निश्कान गरिएको प्रवक्ता मिन विश्वकर्माले मिडियालाई जानकारी दिएको हो ।
