दाङ । केही स्थानीय सञ्चारमाध्यमले लुम्बिनी प्रदेशसभाका माननीय तारा थापाका विषयमा कलोलकल्पित र आधारहिन आरोप लगाई समाचार सम्प्रेषण गरेको विषयलाई खण्डन गर्दै स्वकीय सचिव दलबहादुर घर्तीमगरले विज्ञप्ति जारी गर्नुभएको छ । दलबहादुर घर्तीमगरले पुस २९ गते एक वक्तव्य जारी गर्नुभएको हो ।
घर्तीद्वारा जारी वक्तव्यमा कतिपय पत्रपत्रिका र अनलाइनहरूले प्रमाण र तथ्य विना नै समाचार सम्प्रेषण गरी मा. तारा थापासँग पूर्वाग्रही गरेको उल्लेख छ ।
प्रेस वक्तव्यमा लेखिएको छ :
“केही स्थानीय सञ्चार माध्यममा लुम्बिनी प्रदेशसभाका माननीय तारा थापाका विषयमा कलोलकल्पित र आधारहिन आरोप लगाई समाचार सम्प्रेषण गरेकोमा हाम्रो ध्यानाकर्षण भएकोले यो विज्ञप्ति जारी गरिएको छ ।
१. समाचारमा मा. तारा थापाले आफ्ना पति रामकुमार क्षेत्रीलाई स्वकीय सचिव बनाएर नातावादलाई प्रश्रय दिएको आरोप लगाइएको छ । तारा थापा लुम्बिनी प्रदेशसभामा २०७९ सालमा निर्वाचित भएदेखि केही समय प्यूठानका विवेक जिसी र उहाँको परिवर्तन पछि दाङ निवासी दलबहादुर घर्तीमगर स्वकीय सचिवको भूमिकामा कार्यरत रहनु भएको छ । उक्त कुराको स्पष्ट प्रमाण लुम्बिनी प्रदेशसभा सचिवालयबाट जोसुकैले हेर्न र लिन सक्दछन् । लुम्बिनी प्रदेशसभा सचिवालयसँग कुनै सम्पर्क र सम्बन्ध नै नराखी कपोलकल्पित समाचार लेख्ने कार्यले अनलाइन मा. तारा थापासँग पूर्वाग्रही रहेको स्पष्ट हुन्छ ।
२. मा. तारा थापाले पाउने सेवा, सुविधा र वेतन वा पारिश्रमिक लुम्बिनी प्रदेशसभाले बनाएको ऐन, कानुन मुताविक पाउने गर्नुभएको छ । कानुनभन्दा बाहिर गएर वा अनैतिक ढंगबाट कुनै अतिरिक्त सेवा सुविधा वा लाभ लिनु भएको छैन । अनैतिक वा गैरकानुनी ढंगबाट कुनै सेवा, सुविधा वा अतिरिक्त लाभ लिनु भएको भए सम्बन्धित पत्रिकालाई प्रमाण प्रस्तुत गर्न चुनौति दिन्छौँ । विना प्रमाण कसैमाथि आरोप लगाउनु वा चरित्रहत्या गर्नु स्वच्छ पत्रकारिताभित्र पर्दैन ।
३. मा. तारा थापालाई गुल्मी जिल्ला कालिगण्डकी गाउँपालिकामा ०७४–०७९ को अवधिमा उपाध्यक्षमा कार्यरत रहेको अवस्थामा विदेश नै नगइ विदेश भ्रमण भत्ता बुझेको गम्भीर आरोप पत्रिकामा लगाइएको छ । तर त्यो आरोप लगाउँदा पत्रिकाले कुनै प्रमाण प्रस्तुत गर्न सकेको छैन । प्रमाण विना नै अन्य पनि कैयौँ आरोप लगाउने काम भएको छ । त्यसबाट त्यो पत्रिकाले कसैको स्वार्थ पूरा गर्न नै नियोजित रुपले आरोप लगाएको स्पष्ट हुन्छ ।
४. गुल्मी जिल्लाको कालिगण्डकी गाउँपालिकामा स्थानीय निर्वाचन २०७४ मा एमाले र २०७९ मा कांग्रेससँग राजमोको गठबन्धन भएको थियो । गठबन्धनको अर्थ पारस्परिक रुपमा एक अर्कालाई सहयोग गर्नु नै हुन्छ । २०७४ मा राष्ट्रिय जनमोर्चाले एमालेलाई अध्यक्षमा र एमालेले राष्ट्रिय जनमोर्चालाई उपाध्यक्षमा सहयोग गर्ने सहमति भएको थियो । राष्ट्रिय जनमोर्चाको भोट एमाले र एमालेको भोट राष्ट्रिय जनमोर्चालाई परेको थियो । त्यही कुरा २०७९ को स्थानीय तहको निर्वाचनमा गठबन्धनका घटकका बीच सहमति भइ मत वा भोटको आदान–प्रदान भएको थियो । त्यस प्रकारको कार्यलाई पत्रिकाले एमाले वा कांग्रेसले राष्ट्रिय जनमोर्चालाई गुन लगाएको देख्नु तर जनमोर्चाले एमाले वा कांग्रेसलाई गुन लगाएको नदेख्नु पनि पत्रिकाको दोषपूर्ण मानसिकताको परिणाम हो ।”
