नयाँ दिल्ली । हिमाचलको सोलन जिल्ला अन्तर्गत अर्की भन्ने स्थानमा भएको आगलागीबाट ज्यान गुमाउनेहरूप्रति मूल प्रवाह अखिल भारत नेपाली एकता समाजले श्रद्धान्जली प्रकट गरेको छ । केन्द्रीय समितिका अध्यक्ष प्रेम पौडेलले १३ जनवरीका दिन एक वक्तव्य जारी गरी मृतकप्रति श्रद्धाञ्जली प्रकट गर्दै घाइतेहरूको शिघ्र स्वास्थ्यलाभको कामना प्रकट गर्नुभएको छ ।

पौडेलले वक्तव्यमा आगलागीमा परि ज्यान गुमाउनेहरू र घाइतेहरूलाई क्षतिपूर्तिको मागको लागि जोड दिनुभएको छ । साथै, शोकाकुल परिवारजनमा गहिरो समवेदना प्रकट गर्नुभएको छ ।

प्रेस वक्तव्यमा लेखिएको छ :

“भारतको हिमाचल राज्य, सोलन जिल्लाको अर्की ग्राम पंचायत वार्ड नं. ६, अर्की बजारमा भएको भीषण आगलागीको घटनाप्रति मूल प्रवाह अखिल भारत नेपाली एकता समाजको गम्भीर ध्यानाकर्षण भएको छ ।

उक्त दुःखद घटनामा ८ वर्षिय प्रशान्तको मृत्यु भएको छ र कैयौं घाइते भएकाछन् । अहिले पनि दुई नेपाली परिवारका ५ बच्चा र दुई महिला दुई पुरूष गरि ६ जना लापता छन् । लापता हुनेमा सल्यान जिल्ला नेपाल घर भएका हरिरामका छोरा काशीराम वर्ष ४२, काशीराम की पत्नी टिका वर्ष ३०, काशीरामकी छोरी वर्ष १३, काशीरामका छोरा सन्दीप वर्ष ८, त्यस्तै सल्यान जिल्लाकै धन बहादुर वर्ष ३३, धन बहादुरकी छोरी राधा वर्ष ११ र धन बहादुरका छोरा डेढ वर्षका सेजन रहेका छन् ।

भुइतल्ला र पहिलोतल्लामा दुकानहरू दोस्रोतल्लामा मजदुरहरूको डेरा भएको अर्की बजारमा ११ जनवरी २०२६ रविवार राती आगलागी भएको थियो । आगोको कारणले खाना पकाउने गैस सिलेण्डरहरू लगातार विस्फोट भएका थिए । त्यसपछि स्थिती झन भयावह भएको थियो । आगलागीमा १५ घरहरू जलेर नस्ट भएकाछन् । कैयौं घरहरू ढुंगा–माटो र काठका दलिनहरू सहितका भएको हुँदा मलवाको थुप्रोमा परिणत भएका छन् । बचाउ तथा उद्धार कार्यमा स्थानीय प्रशासन सहित राष्ट्रिय आपदा प्रतिकृया फोर्स र राज्य आपदा प्रतिकृया फोर्सको टिम खटिएको छ ।

हिमाचलमा ठुलो संख्यामा नेपालीहरू मजदुरीको काममा आउने गर्दछन् । देशमा रोजगरी नहुँदा भारत लगायत विभिन्न देशहरूमा श्रमको लागि विदेशीनु पर्ने बाध्यता रहेको छ । हिमाचलमा खेती, बागवानी, निर्माण कार्य, भरिया आदि कार्यमा ठुलो संख्यामा नेपालीहरू कार्यरत छन् । उनीहरू विकट र दूर्गम गाँउहरूमा समेत पुगेर काम गरेका छन् । उनीहरू चर्को श्रम शोषणमा त परेकै हुन्छन् । प्रकृतिक घटना दुर्घटना आदिको पनि सामना गर्नुपरेको हुन्छ । कैयौं पटक नेपालीहरू दुर्घटनाहरूमा पाईने क्षतिपुर्ती र अनुदान आदिमा पनि भेदभावको शिकार हुने गरेको पाइएको छ । हामी पीडित परिवारलाई सरल र समयमै क्षतिपूर्ति गराउन सम्बधित निकाय, हिमाचल सरकार तथा भारत सरकारसँग माग गर्दछौँ ।

अन्तमा, यस अकल्पनीय घटनामा परी ज्यान गुमाउनेप्रति मूल प्रवाह अखिल भारत नेपाली एकता समाज भावपूर्ण श्रद्धाञ्जली अर्पण गर्दछ । साथै, शोकाकुल परिवारजनमा गहिरो समवेदना प्रकट गर्दै घाइतेहरूको शीघ्र स्वास्थ्य लाभको कामना गर्दछौँ ।”