काठमाडौँ । प्रहरी नायब महानिरीक्षक (डिआइजी) निरज शाही र प्रधुम्न कार्की अतिरिक्त महानिरीक्षक (एआइजी) मा बढुवा भएका छन् । बुधबार साँझ गृहमन्त्रालयमा बसेको बढुवा समितिको बैठकले रिक्त दुई एआइजीका लागि बढुवा सिफारिस गरेको हो ।
बढुवा समितिमा प्रधानमन्त्री कार्यालयका सचिव, गृह सचिव र आइजिपी रहन्छन् । अब एक साताभित्र कुनै उजुरी नपरे सरकारले उनीहरूलाई एआइजीमा पदस्थापन गरिने छ ।
बढुवाका लागि शाही र कार्कीसँगै विश्वराज पोख्रेल पनि दाबेदारका रूपमा थिए । यीमध्ये पोख्रेल उनीहरूभन्दा पछाडि भर्ती भएका र डिआइजीमा पनि पछाडि नै बढुवा भएका हुन् ।
शैलेश थापा क्षेत्री आइजीमा बढुवा भएपछि र अर्का एआइजी तारिणीप्रसाद लम्सालले अवकास पाएपछि गत असार २५ गतेदेखि तीनमध्ये दुई एआइजी रिक्त भएका हुन् ।
शाही र कार्की वर्तमान महानिरीक्षक शैलेश थापाकै ब्याची हुन् । उनीहरू एकैपटक डिआइजीमा बढुवा भएका थिए । तर एआइजी बढुवामा यो ब्याचबाट दुई जना पर्दा हरि पाल र शैलेश थापा बढुवा भए ।
अब प्रहरीका आइजी र तीन एआइजी एउटै ब्याची हुने छन् । बढुवा समितिको यो निर्णयसँगै भावी आइजिपी डिआइजीबाट सिधै बढुवा गर्नुपर्ने भएको छ । आइजीसँगै सबै एआइजी २२ महिनापछि अवकास हुने छन् ।
