काठमाडौँ । नेकपा (मसाल) ले धनुषा घटनाले साम्प्रदायिक रूप लिन सक्नेप्रति सचेत रहन सबैको ध्यानाकर्षण गराएको छ ।
महामन्त्री मोहनविक्रम सिंहको हस्ताक्षरमा २०८२ पुस २१ गते अबेर राति जारी प्रेसवक्तव्यमा सो धारणा व्यक्त गरिएको हो ।
नेपालको संविधानमा व्यवस्था भएको धर्मनिरपेक्षताको मर्म विपरीत धनुषाको सामान्य घरेलु विवादलाई साम्प्रदायिक रूप प्रदान गर्न खोजिएको मसालको आरोप छ ।
भारतको सीमावर्ती सहरका कतिपय कट्टर हिन्दुवादीले नेपालका सामान्य विवादलाई साम्प्रदायिक रूप प्रदान गर्न खोजेकोप्रति सचेत रहन पार्टीले ध्यानाकर्षण गराएको हो ।
यस्तो छ, प्रेसवक्तव्यको पूर्ण पाठ :
“तराईका केही जिल्लामा देखा परेको धार्मिक तनावको स्थितिप्रति नेकपा (मसाल) को गम्भीर ध्यान आकर्षित भएको छ । धनुषाको सामान्य घरेलु विवादबाट सुरु भएको त्यो विवादले हिन्दुमुस्लिम तनावको रूप लिन पुगेको छ र अहिले त्यो तनाव तराईका कतिपय जिल्लामा सरिसकेको छ । त्यसबाट देशमा गम्भीर प्रकारको हिन्दुमुस्लिम तनाव पैदा हुने सम्भावनालाई पनि अस्वीकार गर्न सकिन्न ।
भारतका कट्टर हिन्दुवादी तत्त्वहरूले बारम्बार नेपालमा हिन्दु र मुस्लिमका बिचमा साम्प्रदायता बढाउन प्रयत्न गर्दै आएका छन् । नेपाल एउटा धर्मनिरपेक्ष देश हो र सबै धर्मका बिचमा सदभावना र मैत्रीपूर्ण सम्बन्ध रहँदै आएको छ तैपनि कतिपय कट्टर हिन्दुवादीले, खास गरेर भारतका सीमावर्ती सहरमा रहेका कट्टर हिन्दुवादीले नेपालमा कुनै सामान्य विवाद पैदा हुनेबित्तिकै त्यसलाई साम्प्रदायिक रूप दिने र हिन्दुमुस्लिमका बिचमा तनाव पैदा गर्ने प्रयत्न गर्दै आएका छन् । अहिले मधेस प्रदेशका केही जिल्लामा देखा परेको धार्मिक तनावका पछाडि पनि त्यो कारणले काम गरेको कुराको अनुमान गर्न सकिन्छ । धनुषाको सामान्य घरेलु विवादपछि सुरु भएको हिन्दुमुस्लिम तनाव मधेस प्रदेशका कतिपय जिल्लामा फैलिएको छ । त्यो तनावलाई शान्तिपूर्ण तरिकाले समाधान गर्नेतिर सबैको ध्यान जानुपर्ने आवश्यकता छ अन्यथा त्यसले अरू व्यापक रूप लिँदै जाने सम्भावना रहनेछ । त्यस्तो हुन नपाओस् भन्नका लागि हाम्रो पार्टीले सम्पूर्ण नेपाली जनताको ध्यान आकर्षित गर्न चाहन्छ ।
नेपाल एउटा धर्मनिरपेक्ष देश हो र त्यसैले नेपालका सबै धर्मका बिचमा सहिष्णुतापूर्ण सम्बन्ध कायम राख्न सबैको ध्यान जानुपर्ने आवश्यकता छ तर नेपालमा राजावादीले धर्मनिरपेक्षतालाई समाप्त गरेर हिन्दु राष्ट्र निर्माण गर्न चाहन्छन् । उनीहरूको त्यस प्रकारको कार्यमा भारतका कट्टरपन्थी हिन्दु वा राष्ट्रिय स्वयम्सेवक सङ्घको पनि समर्थन रहने गरेको आम रूपमा थाहा भएको कुरा हो । हाम्रो पार्टीले धर्मनिरपेक्षतालाई कायम राख्नुपर्ने र सबै धर्मका बिचमा मैत्रिपूर्ण सम्बन्ध वा सहिष्णुताको वातावरण कायम राख्नुपर्ने आवश्यकतामा जोड दिँदै आएको छ र अहिले पनि त्यो कुरामा जोड दिन्छ । त्यसैले अहिले मधेसका कतिपय जिल्लामा देखा परेको धार्मिक तनावले नेपालको संविधानमा व्यवस्था गरिएको धर्मनिरपेक्षतासित मेल खाँदैन । त्यसकारण हाम्रो पार्टीले धर्मनिरपेक्षताको स्प्रिटअनुसार सबै धर्मका बिचमा मैत्रीपूर्ण सम्बन्ध कायम राख्दै शान्तिपूर्ण वातावरण सिर्जना गर्नुपर्ने आवश्यकतामा जोड दिन्छ ।”
