काठमाडौँ । अमेरिकाद्वारा भेनेजुयलाका राष्ट्रपति निकोलस मदुरो गिरफ्तारीको छ किसान सङ्गठनले विरोध गरेका छन् ।
२०८२ पुस २१ गते सोमबार संयुक्त प्रेसवक्तव्य जारी गर्दै उनीहरूले मदुरो गिरफ्तारीलाई अमेरिकाको गैरकानुनी तथा नैतिकहीन अपहरणको संज्ञा दिएका हुन् ।
वक्तव्यमा अमेरिकाको सो कार्यलाई स्वतन्त्र तथा सार्वभौम जनता विरुद्धको जघन्य कार्य बताइएको छ । साथै उक्त कार्य अन्तर्राष्ट्रिय कानुन, संयुक्त राष्ट्र सङ्घको वडापत्र, राष्ट्रिय सार्वभौमिकत्ता तथा राजनीतिक स्वतन्त्रताको मौलिक सिद्धान्तप्रतिको घोर उल्लङ्घन बताइएको छ ।
उक्त गिरफ्तारीलाई वक्तव्यमा साम्राज्यवादद्वारा प्राकृतिक स्रोतको लुट तथा समाजवादी क्रान्तिलाई ध्वस्त पार्न चलाइएको दीर्घकालीन षड्यन्त्रको निरन्तरता पनि उल्लेख गरिएको छ ।
भेनेजुयलामाथिको आक्रमण विश्वका श्रमिक वर्ग तथा किसानमाथिको आक्रमण बताउँदै वक्तव्यमा चार बुँदे माग राखिएको छ ।
ती चार मागमा मदुरोको तुरुन्त र विनाशर्त रिहाइ गरिनुपर्ने, भेनेजुयला विरुद्धको सम्पूर्ण सैन्य, राजनीतिक र आर्थिक आक्रमण अन्त्य गरिनुपर्ने, भेनेजुयलामाथिका प्रतिबन्ध र नाकाबन्दी खारेज गरिनुपर्ने र मदुरो गिरफ्तारीका योजनाकार र अपराधीलाई अन्तर्राष्ट्रिय अदालतमा जबाफदेही बनाउनुपर्ने रहेका छन् ।
प्रेसवक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी केन्द्र) का चित्रबहादुर श्रेष्ठ, अखिल नेपाल महासङ्घका संयोजक बलदेव चौधरी, क्रान्तिकारी किसान महासङ्घ नेपालका अध्यक्ष सीताराम तामाङ, अखिल नेपाल किसान यूनियनका अध्यक्ष रामदुलार महतो र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको छ ।
