खलङ्गा । प्युठानको झिमरुक गाउँपालिकामा अखिल नेपाल युवक सङ्घको सङ्गठनात्मक अभियान सुचारु छ ।
युवक सङ्घका अध्यक्ष गणेश अधिकारी, उपाध्यक्ष चोपबहादुर विक, महासचिव विष्णु पुन, नेकपा (मसाल) ५ नम्बर ब्युरो प्रवक्ता तिलक जिसीलगायतको नेतृत्वमा सो अभियान सञ्चालन भइरहेको हो ।
झिमरुक गाउँपालिकाको वडा नम्बर ७ तुसारामा युवक सङ्घले २०८२ पुस २० गते जनभेटघाट, प्रशिक्षणलगायतका कार्यक्रम सम्पन्न गरिरहेको छ । सो टोलीमा अध्यक्ष अधिकारी, उपाध्यक्ष विक, मसालका प्रवक्ता जिसीलगायतको नेतृत्व रहेको छ ।
सो टोली भोलि पुस २१ गते सोही वडाको पुतागाउँमा जाने योजना रहेको आयोजकले जानकारी दिएको छ ।
महासचिव विष्णु पुनसहितको टोलीले झिमरुकको वडा नं. ३ दारिमचौरमा प्रशिक्षण कार्यक्रमसँगै टोल समिति गठन गरेको छ ।
वडाअध्यक्ष मीनबहादुर खत्रीको समेत आतिथ्य रहेको सो भेलाले सुन्दर जिसी अध्यक्ष रहनुभएको युवक सङ्घको टोल समिति गठन गरेको छ ।
समितिको उपाध्यक्षमा दीपक खड्का, सचिवमा मानबहादुर केसी, सहसचिवमा सिर्जना केसी, कोषाध्यक्षमा सरिता केसी तथा सदस्यमा आलोक जिसी र प्रताप जिसी रहनुभएको छ ।
सोही वडाको नब्बे एरियामा टोलीले कार्यकर्ता भेटघाट तथा प्रशिक्षण कार्यक्रम सम्पन्न भएको छ ।
महासचिव पुन, युवक सङ्घकै लुम्बिनी प्रदेश सदस्य नवराज केसी र राजमो प्युठानका जिल्ला सदस्य केशरजङ्ग एमसीले सो कार्यक्रममा प्रशिक्षण दिनुभएको थियो ।
अभियानको उद्घाटन पुस १८ गते मच्छीमा मसालका महामन्त्री मोहनविक्रम सिंहले गर्नुभएको थियो । झिमरुक र गौमुखी गाउँपालिकामा अभियान एक महिनासम्म चल्ने आयोजकले जनाएको छ ।
