खलङ्गा । अखिल नेपाल युवक सङ्घको एकमहिने प्युठान अभियान नेकपा (मसाल) का महामन्त्री मोहनविक्रम सिंहको उद्घाटनसँगै सुरु भएको छ ।
झिमरुक गाउँपालिका–५ मच्छीमा २०८२ पुस १८ गते शुक्रबार मच्छीमा आयोजित औपचारिक कार्यक्रममाझ महामन्त्री सिंहले अभियानको उद्घाटन गर्नुभएको हो ।
सो अवसरमा मन्तव्य राख्दै महामन्त्री सिंहले युवाशक्तिको भूमिकाबाट देशमा आमूल परिवर्तन हुने दाबी गर्नुभयो ।
जेनजी पनि युवा आन्दोलन भएको स्पष्ट पार्दै उहाँले सही विचारको अभावमा जेनजीले सही भूमिका खेल्न नसकेकोतर्फ युवा समुदायको ध्यानाकर्षण गराउनुभयो ।
कार्यक्रममा राष्ट्रिय जनमोर्चाका केन्द्रीय सल्लाहकार आनन्द शर्मा, राजमो नेतहरू सुरेश थापा, वासुदेव पोखरेल, जातीय समता समाजका केन्द्रीय उपाध्यक्ष अइन्द्र विक, अखिल नेपाल किसान महासङ्घ (अप्फा) का केन्द्रीय सचिव वीरबहादुर जिसी, अखिल नेपाल महिला सङ्घकी केन्द्रीय सल्लाहकार पवित्रा जिसी र नेकपा (मसाल) ५ नम्बर ब्युरो प्रवक्ता तिलक जिसीले पनि शुभकामना दिनुभएको थियो ।
त्यस्तै कार्यक्रमलाई शुभकामना दिने अन्य अतिथिमा अखिल नेपाल टे«ड युनियन महासङ्घ (अन्टुक) प्युठानका अध्यक्ष पदम जिसी, राजमो प्युठानका कोषाध्यक्ष टिका जिसी, अखिल नेपाल शिक्षक सङ्घ प्युठानका कोषाध्यक्ष कर्ण जिसी, रक्तिम सांस्कृतिक अभियान प्युठानका उपाध्यक्ष रेकम रसाइलीलगायतले शुभकामना दिनुभएको थियो ।
सो अवसरमा झिमरुक–३ का वडाअध्यक्ष मीनबहादुर केसी, वडा नं. ४ का वडाअध्यक्ष सीताराम पोखरेललगायतको आतिथ्य रहेको थियो ।
कार्यक्रमको अध्यक्षता केन्द्रीय अध्यक्ष गणेश अधिकारीले, सञ्चालन महासचिव विष्णु पुनले र स्वागत उपाध्यक्ष चोपबहादुर विकले गर्नुभएको थियो ।
कार्यक्रममा रक्तिम सांस्कृतिक अभियानका कलाकारद्वारा सांस्कृतिक कार्यक्रम प्रस्तुत गरिएको थियो ।
अध्यक्ष अधिकारीका अनुसार मच्छीमा आज पुस १९ गते पनि प्रशिक्षण कार्यक्रम चल्नेछ । त्यसपछि आगामी एक महिनासम्म झिमरुक र गौमुखी गाउँपालिकाका सबै वडालाई समेट्ने गरी जनभेटघाट, प्रशिक्षण, सङ्गठन विस्तार, बैठक, पर्चा वितरण, सभा, सांस्कृतिक कार्यक्रम सम्पन्न हुनेछन् ।
