काडमाडौँ । करिब १७ वर्षदेखि निरन्तर रुपमा राष्ट्रिय जनमोर्चाले प्रवासी नेपालीका लागि मताधिकार र समानुपातिक प्रतिनिधित्वको माग गर्दै आएको छ । राजमोले उठाउँदै आएको ‘प्रवासी नेपालीलाई मताधिकार र समानुपाति प्रतिनिधित्वको व्यवस्था गर’ भन्ने नारालाई व्यवहारिक रुपमा आफ्नो पार्टीबाट शुरु गरेको छ ।
त्यस अनुसार राजमोले आगामी निर्वाचनमा ५.५० प्रतिशत प्रवासी नेपालीको प्रतिनिधित्वको व्यवस्था गरेको छ । जसअनुसार छजना प्रवासी नेताहरूलाई राष्ट्रिय जनमोर्चाले उमेदवारमा सिफारिस गरेको छ ।
जसमाः भारतबाट ठाकुर प्रसाद खनाल, प्रेम प्रसाद पौडेल, तारा बहादुर सोमरे मगर, रमकला पुन घर्तिमगर, हङकङबाट सक्तमान बुढाथोकी र जापानबाट रेणु गुरुङलाई समानुपातिक उमेदवारहरूको लागि सिफारिस गरेको हो ।
तारा बहादुर सोमरे मगर, रमकला पुन घर्तिमगर, सक्तमान बुढाथोकी र रेणु गुरुङ आदिवासी जनजाति एवं ठाकुर प्रसाद खनाल र प्रेम प्रसाद पौडेल खसआर्य कलस्टरबाट सिफारिस भएका हुन् ।
राष्ट्रिय जनमोर्चाले ५० प्रतिशत महिलासहित एक सय १० जनाको बन्दसूची आयोगमा बुझाइएको छ । नियमावलीअनुसार खसआर्य ३३ जना (३०.२८ प्रतिशत), आदिवासी जनजाति ३२ (२८.७२ प्रतिशत), मधेसी १८ (१६.१५ प्रतिशत), दलित १५ (१३.४४ प्रतिशत), थारू ७ (६.५ प्रतिशत) र मुस्लिम ५ (४.८० प्रतिशत) गरी एक सय १० जनाको समानुपातिक तर्फको बन्दसूची बुझाइएको छ ।
