प्यूठान । अखिल नेपाल जनजाति सम्मेलनको एक महिने साङ्गठनिक अभियानअन्तर्गत पुस १२ गते, प्यूठान जिल्ला, स्वर्गद्वारी नगरपालिका वडा नं. ६ र ८ धन्चौर पोखरा डाँडामा एक भव्य आम भेला सम्पन्न भएको छ ।
उक्त भेलाको अध्यक्षता सालिकराम पार्धेले गर्नुभएको थियो भने स्वागत मन्तव्य यम प्रसाद गोराथोकीले राख्नुभएको थियो । कार्यक्रमको सञ्चालन मोहनलाल गोराथोकीले गर्नुभएको थियो ।
कार्यक्रमका प्रमुख अतिथि अखिल नेपाल जनजाति सम्मेलनका केन्द्रीय अध्यक्ष निम बहादुर बुढा रहनुभएको थियो । साथै सम्मेलनका केन्द्रीय सदस्यहरू तमबहादुर जिएम, लाल बहादुर संजाली, गिरबहादुर गुरुङ, ड्रोण रावल, शिव पन्थी, सीमा गुरुङ, बाली विक लगाएत स्थानीय अगुवाहरूको उल्लेखनीय उपस्थिति रहेको थियो ।
भेलामा सहभागी वक्ताहरूले संगठनलाई अझ सुदृढ बनाउँदै जनजाति समुदायसहित सम्पूर्ण जनताको हक–अधिकारको रक्षा, संविधान, गणतन्त्र र लोकतान्त्रिक उपलब्धिहरूको संरक्षणका लागि एकताबद्ध, निरन्तर र सशक्त संघर्ष गर्नुपर्नेमा जोड दिनुभएको थियो ।
