काठमाडौँ । महामन्त्री मोहनविक्रम सिंहको प्रमुख आतिथ्यमा नेकपा (मसाल) केन्द्रीय कार्यालय एक सय तेत्तिसौँ माओजयन्ती मनाउने भएको छ ।
२०८२ पुस ११ गते (डिसेम्बर २६) शुक्रबार राष्ट्रिय जनमोर्चा केन्द्रीय कार्यालयको सभाकक्षमा दिउसो १२ बजेदेखि उक्त कार्यक्रम हुन थालेको हो ।
मसाल केन्द्रीय कार्यालयले दिएको जानकारीअनुसार कार्यक्रममा राजमो केन्द्रीय कावा अध्यक्ष रश्मिराज नेपालीको पनि उपस्थिति रहेको छ ।
त्यस्तै, मसालका केन्द्रीय प्रवक्ता रामप्रकाश पुरीसँगै काठमाडौँ उपत्यकाका मसालसम्बद्ध जनवर्गीय सङ्गठनका नेताकार्यकर्ताको सो कार्यक्रममा उपस्थिति रहने जनाइएको छ ।
मसालका अनुसार एक सय तेत्तिसौँ माओजयन्ती देशविदेशमा प्रत्यक्ष उपस्थिति तथा भर्चुअल माध्यमबाट मनाइने पनि जानकारी दिइएको छ ।
माओत्सेतुङको जन्म चीनको हुनानमा सन् १८९३ मा भएको थियो । कम्युनिस्टहरूले माओलाई माक्र्सवाद–लेनिनवादको सिर्जनात्मक प्रयोगकर्ता मान्दछन् ।
पुँजीवादी विकास भइनसकेको देशमा सर्वहारा क्रान्तिको नयाँ मोडेलको रूपमा नयाँ जनवादी क्रान्तिको सिद्धान्त आविष्कार र त्यसको व्यावहारिक प्रयोगको श्रेय माओलाई दिने गरिन्छ ।
