नई दिल्ली । मूल प्रवाह अखिल भारत नेपाली एकता समाजले २२ दिसेम्बर २०२५का दिन भारतको आसामको कार्बी आङलोङमा भएको घटनाप्रति खेद प्रकट गर्दै भारत सरकारसँग नेपालीहरूको जिउधनको सुरक्षा र पिडीतहरूको क्षतिपुर्तिको माग गरेको छ । २३ दिसेम्बर २०२५ क दिन केन्द्रीय अध्यक्ष प्रेम पौडेलले वक्तव्य जारी गरि उक्तमाग गर्नुभएको हो ।

प्रेम पौडेलद्धारा हस्ताक्षरित प्रेस वक्तव्यमा भनिएको छ :

“दिसेम्बर २२–२३, २०२५का दिन भारतको आसामको कार्बी आङलोङमा भएको घटनाप्रति मूल प्रवाह अखिल भारत नेपाली एकता समाजको गम्भिर ध्यानाकषर्ण भएको छ ।

भारतको पूर्वोत्तरका राज्यहरूमा त्यहाँका आदिवासीहरूले गैरआदिवासी भगाउ अभियानको नाममा पटक–पटक प्रवासी मजदुरहरूमाथी आक्रमण भइरहेको छ । हालै असमको पश्चिम कार्बी आङलोङमा बाहिरका(गैरआदिवासी)हरूको निश्कासनको माग गर्दै गरिएको प्रदर्शन हिंसात्मक बनेको घटनाप्रति हाम्रो संगठन खेद प्रकट गर्दछ ।

पश्चिम कार्बी आङलोङ भारतीय संविधानको छैटौँ अनुसूचीअन्तर्गत कार्बी आङलोङ स्वायत्त परिषद्को अधिकार क्षेत्रअन्तर्गत रहेको आदिवासी बहुल पाहाडी जिल्ला हो । हालै भएको तनावग्रस्त स्थान स्वायत्त परिषद क्षेत्रमा रहेको व्यावसायिक चराई आरक्षण (पीजीआर) र गाउँ चराई आरक्षण (भीजीआर) (आरक्षित चरन भूमि)मा भएकाले अतिक्रमण हटाउने माग गर्दै विगत दुई हप्तादेखि फेलङपीमा केही कार्वि जातिका मानिसहरू धरना अनशनमा बसेका थिए । उनीहरूलाई १५ दिनको अनशनपछि स्वास्थ्य अवस्था बिग्रन सक्ने भन्दै स्वास्थ्यको कारण देखाएर प्रशासनले गुवाहाटी लगेको थियो, उक्त घटना पछि गिरफ्‌तारीको अफवाह फैलिएको थियो । अफवाह पछि खेरिनीमा तनाव उत्पन्न भएको थियो ।

जहाँ भिडले प्रहरी चौकीमा ढुङ्गामुढा गरे साथै नजिकै रहेका बिहारी र नेपाली समुदायका मानिसहरूमाथि आक्रमण भएको थियो । त्यहाँ भएको साम्प्रदायीक घटनामा नेपालीहरूका घर–दुकानमा आगजनी र तोडफोड गरिएको छ । प्राप्त जानकारी अनुसार हालसम्म पार्वती शर्मा, सुरज क्षेत्री, पंकज क्षेत्री, विष्णु क्षेत्री, प्रकाश क्षेत्री, विक्रम क्षेत्री, सविता शर्मा, चन्द्रबहादुर क्षेत्री, सिता तमाङ, सानु बस्नेत लगायतको दुकान र गणेश विक, गणेश विक (बि), धनबहादुर तमाङ, राजु विक, बालु सुनार आदिको घरमा आगजनी र ढुङ्गामुढा गरेका छन् ।
यो सर्वविदितै भएको कुरा हो, भारतमा दुईखाले नेपालीहरू छन् । १८१६को सुगौली संधीको आधारमा भारतीय नागरिक बनेका नेपालीहरू र १९५०को आधारमा रोजगारीको लागि भारतमा आएका प्रवासी नेपालीहरू । दुबै प्रकारका नेपालीहरूको हकहित र सुरक्षाको दायीत्व भारत सरकारको हो ।

अतः हामी भारत सरकार तथा प्रशासनसँग भारतमा रहेका नेपालीहरूको जिउधनको सुरक्षा र पिडीतहरूको उचित क्षतिपुर्तिको माग गर्दछौँ ।”