काठमाडौँ । जेनजी आन्दोलनका क्रममा भएको ध्वंसात्म कार्यको छानविन आयोगले अर्को साता ओली र लेखराज भट्टलाई सोधपुछ गर्ने समाचार बाहिरिएसँगै (एमाले) सरकारसँग मुठभेडमा जाने संकेत देखापरेको छ । तेश्रो पटक अध्यक्ष भएका केपी शर्मा ओलीले पार्टीको ११औँ महाधिवेशनको समापन समारोहलाई सम्बोधनका क्रममा मुठभेड गर्ने संकेत गर्दै ‘देश ठप्प पार्न तयार रहन’ कार्यकर्ताहरूलाई निर्देशन दिएका छन्‌ ।

एमालेको तेस्रो पटक अध्यक्ष चुनिएका ओलीले बिहीबार महाधिवेशन समापन समारोहलाई सम्बोधन गर्दै उत्तेजक अभिव्यक्ति दिंदै थिए । ओलीले ‘देश ठप्प पार्न तयार रहन’ कार्यकर्तालाई निर्देशनसमेत दिए । अध्यक्षका रूपमा तेस्रो इनिङ थाल्दै गर्दा भने उनी ‘ब्याक टू फर्म’ देखिएका थिए ।

बिहीबार समापन कार्यक्रममा बोल्दै ओलीले एमाले नेतृत्वमाथि भौतिक हमला हुन सक्ने खतरा बढिरहेको दाबी समेत गरे । नेतृत्वमाथि भौतिक हमला भएको दिन देश ठप्प हुनुपर्ने र वर्तमान सरकार ढल्नुपर्ने चेतावनी पनि उनले दिए ।

‘एमाले नेतृत्वमाथि मिडिया ट्रायल भइरहेको छ । अहिलेसम्म मिडिया प्रचार भयो, अब भौतिक हमला हुन सक्छ । पञ्चायतकालमा जस्तै जालसाजीका मुद्दा–मामिला चलाइने सक्छ’ ओलीले भने, ‘एमाले नेतृत्वमाथि भौतिक हमला हुने सम्भावना पनि छ। भौतिक हमला भएको दिन यो देश ठप्प हुनुपर्छ, यो सरकार पनि ढल्नुपर्छ । त्यसका निम्ति तयार रहन निर्देशन दिन्छु ।’

सुशीला कार्की नेतृत्वको सरकारले चुनावी वातावरण बनाउने काम नगरेको उल्लेख गर्दै ओलीले सरकारलाई चेतावनीको भाषामा भने, ‘सके चुनावको तयारी गर, नसके बाटो लाग ।’

ओलीको यस प्रकारको अभिव्यक्तिले देशको भविष्य कता जाँदैछ, त्यो आम मानिसलाई चिन्ता र चासोको विषय बनेको छ । नेपालको राजनीतिमा ओली आफ्‌नो कम्जोरी स्वीकार नगर्ने नेताका रुपमा चर्चित भइरहेको समयमा उनको यो अभिव्यक्तिले देशमा ठूलै मुठभेड निम्तीने त होइन ? त्यो राजनीतिक जानकारहरू नै बताउलान् ।