धनगढी । राष्ट्रिय जनमोर्चा कैलालीले वर्तमान अवस्थाबारे पार्टीको धारणा सार्वजनिक गर्न जुलुससहितको सभा सम्पन्न गरेको छ ।
राजमो केन्द्रीय सदस्य तथा सुदूरपश्चिम प्रदेश समितिका अध्यक्ष नन्दराज भट्टको प्रमुख आतिथ्यमा २०८२ मङ्सिर २९ गते सोमबार गोदावरी नगरपालिकाको अत्तरियामा सो कार्यक्रम सम्पन्न भएको हो ।
सो अवसरमा मन्तव्य राख्दै प्रमुख अतिथि भट्टले सङ्घीयता खारेज हुनुपर्ने धारणा व्यक्त गर्नुभयो ।
सङ्घीय संरचनाले देशमा अनावश्यक खर्च बढाएको र अपेक्षित सुशासन दिन नसकेको भन्दै उहाँले अब वैकल्पिक राजनीतिक शक्तिको आवश्यकता रहेको बताउनुभयो ।
देशमा व्याप्त भ्रष्टाचारको अन्त्य र सुशासन स्थापनाका लागि राजमोलाई बलियो बनाउनुपर्ने समय आएको उल्लेख गर्दै उहाँले आगामी निर्वाचनमा पार्टीलाई मतदान गर्न आम नागरिकसँग आग्रहसमेत गर्नुभयो ।
सभा हुनुभन्दा अघि गोदाबरी नगरपालिका–१ पूर्वपश्चिम राजमार्गको वनखेतबाट सङ्घीयता खारेज गर !, भ्रष्टाचार अन्त गर !, देशमा स्वशासन कायम गर !, भ्रष्टाचारीलाई कारबाही गर !, राष्ट्रिय जनमोर्चा जिन्दावाद ! लगायतका गगनभेदी नारा लगाउँदै अत्तरिया बजार परिक्रमा गरी दुर्गामन्दिरको अगाडि प्रचारसभामा परिणत भएको थियो ।
वामपन्थी नेता रामचन्द्र भट्टको विशिष्ट आतिथ्य रहेको उक्त कार्यक्रममा राजमोे सुदूरपश्चिम प्रदेश समितिका उपाध्यक्ष हरिकृष्ण पाण्डेय, प्रदेश सचिव राजाराम चौधरी, प्रदेश सदस्य तथा कञ्चनपुर अध्यक्ष रामबहादुर कार्की, अखिल (छैठौं) का पूर्व कोषाध्यक्ष हेमराज भट्ट, अखिल नेपाल महिला सङ्घकी केन्द्रीय सदस्य कुन्तीदेवी पाण्डे, अखिल नेपाल युवक सङ्घका जिल्ला अध्यक्ष प्रेम चन्द, अखिल नेपाल किसान महासङ्घ (अप्फा) का सुदूरपश्चिम प्रदेश सचिव चन्द्रबहादुर विष्ट, जातीय समता समाजका जिल्ला अध्यक्ष शेरबहादुर विक, मूल प्रवाह अखिल नेपाली एकता समाजका परमानन्द खडायतको पनि आतिथ्य रहेको थियो ।
सभाको अध्यक्षता राजमो कैलालीका उपाध्यक्ष शोभामणि भट्टले, सञ्चालन जिल्ला सचिव मेयरजङ्ग शाही र स्वागत जिल्ला सदस्य चन्द्रबहादुर विष्टले गर्नुभएको थियो ।
कार्यक्रममा रक्तिम परिवार कलाकारद्वारा गीत प्रस्तुत गरिएको थियो ।
