तमघासबजार । राष्ट्रिय जनमोर्चा गुल्मीले साम्राज्यवादको विरुद्धमा प्रचारात्मक सभा तथा प्रशिक्षण सम्पन्न गरेको छ ।
नेकपा (मसाल) ५ नम्बर ब्युरोका प्रवक्ता तिलक जिसीको प्रमुख आतिथ्यमा तमघासबजारमा सो कार्यक्रम सम्पन्न भएको हो ।
राजमो केन्द्रीय सदस्य तथा गुल्मी जिल्ला अध्यक्ष रामकुमार क्षेत्रीको अध्यक्षतमा अघि बढेको उक्त कार्यक्रममा प्रमुख अतिथि जिसीसँगै राजमो केन्द्रीय सदस्य तथा लुम्बिनी प्रदेश सांसद तारा क्षेत्री, जातीय समता समाजका महासचिव खगेश्वर सुनार, राजमो लुम्बिनी प्रदेश समितिका सदस्य रामेश्वर खत्रीलगायतले मन्तव्य राख्नुभएको थियो ।
सो अवसरमा मन्तव्य राख्दै वक्ताहरूले जेनजी आन्दोलनको माग आधारभूत रूपमा सही भए पनि साम्राज्यवादी षड्यन्त्र र घुसपैठका कारण अकल्पनीय विध्वंस भएको बताउनुभयो ।
राष्ट्रियतामाथिको खतरा यतिखेर गम्भीर बनेको बताउँदै वक्ताहरूले राजमोजस्ता सही राजनीतिक शक्तिप्रतिको जनसमर्थनले अर्थ राख्ने धारणा राख्नुभएको थियो ।
राजमो गुल्मीका सचिव छविलाल सर्तुङीको सञ्चालनमा अघि बढेको उक्त कार्यक्रममा उपस्थित सहभागीलाई जिल्ला समितिका सहसचिव हरि न्यौपानेले स्वागत गर्नुभएको थियो ।
सभा समापनसँगै राजमोले तमघासबजारमै प्रशिक्षण कार्यक्रम पनि सुरु गरेको छ । कार्यक्रम भोलिसम्म सुचारु रहने राजमो गुल्मीले जनाएको छ ।
