जगदीश ढकाल, कोहलपुर (बाँके) ।
राष्ट्रिय जनमोर्चाका केन्द्रीय उपाध्यक्ष जनकराज शर्माले सही नियतका साथ अगाडि आएको जेनजी आन्दोलनलाई अमेरिकी साम्राज्यवादले हाइज्याक गरेको बताउनुभएको छ ।
राजमो बाँकेद्वारा २०८२ मङ्सिर २८ गते बाँकेको कोहलपुर न्युरोडचोकमा आयोजित विरोधसभामा मन्तव्य राख्दै उहाँले यस्तो अभिव्यक्ति दिनुभएको हो ।
देशको वर्तमान अवस्थाबारे पार्टीको धारणा सार्वजनिक गर्न आयोजित उक्त सभालाई सम्बोधन गर्दै उहाँले जेनजी युवाले गरेको आन्दोलन सही नियत र उद्देश्यले चलाइएको दाबी गर्नुभयो ।
उहाँले भन्नुभयो– ‘तर अमेरिकी साम्राज्यवादको षड्यन्त्र र घुसपैठले गर्दा उक्त आन्दोलनलाई हाइज्याक गरेर विध्वंस मच्चाउन पुग्यो ।’
साम्राज्यवादीले हाम्रो देशलाई उपनिवेश बनाउने षड्यन्त्र र चलखेल विरुद्ध खबरदारी तथा सङ्घर्षमा साथ दिन सम्पूर्ण सचेत नागरिकलाई अनुरोधसमेत उहाँले गर्नुभयो ।
त्यस्तै अर्का अतिथि अखिल नेपाल किसान महासङ्घ (अप्फा) का महासचिव तुलसीराम सापकोटाले विचार राख्दै प्रत्यक्ष कार्यकारी प्रधानमन्त्रीको कुरा उठाउनुलाई गलत बताउनुभयो ।
उहाँले भन्नुभयो– ‘प्रत्यक्ष कार्यकारी राष्ट्रपति प्रणालीले देशमा सरकार तानाशाही बन्नेछ र यसरी देश राष्ट्रघाती दिशामा जाने सम्भावना सम्भावना रहनेछ ।’
उपाध्यक्ष शर्माले नेपालको सन्दर्भमा प्रत्यक्ष कार्यकारी राष्ट्रपति प्रणालीको राजनीतिक अन्तर्य बुझेकाले विरोध गरेको स्पष्ट पार्नुभयो ।
एवम् प्रकारले अखिल नेपाल युवक सङ्घका केन्द्रीय सल्लाहकार कृष्णराज पाण्डेले अहिले नेपालको राजनीति कमाउधन्दा बनेको बताउनुभयो ।
‘हाम्रो देशको राजनीतिमा सर्वसाधारणलाई लुटेर धनी बन्ने दाउपेच हुने गरेकाले नेपाली जनताले सही राजनीतिलाई छनोट गर्नु आजको आवश्यकता हो’ उहाँको भनाइ थियो ।
कार्यक्रमको सञ्चालन राजमो बाँकेका उपाध्यक्ष जगदीश ढकालले गर्नुभएको थियो ।
