शङ्करप्रसाद पोख्रेल, बुटवल ।
राष्ट्रिय जनमोर्चाका अध्यक्ष चित्रबहादुर केसीले मुलुक र देशको भविष्य सुरक्षित गर्न जनताले अब बुझेर सही राजनीतिक शक्ति रोज्नुपर्ने आवश्यकतामा जोड दिनुभएको छ ।
२०८२ मङ्सिर २७ गते शनिबार राष्ट्रिय जनमोर्चाले रुपन्देहीको बुटवलमा आयोजना गरेको विरोधसभालाई सम्बोधन गर्दै उहाँले यस्तो अभिव्यक्ति दिनुभएको हो ।
केसीले मुलुक आजको जटिल अवस्थासम्म आइपुग्नुमा नेपाली कङ्ग्रेस, नेकपा (एमाले), तत्कालीन माओवादी केन्द्रजस्ता ठुला दल जिम्मेवार रहेको आरोप लगाउनुभयो ।
फरक प्रसङ्गमा उहाँले देशमा अमेरिकी साम्राज्यवाद र विदेशी हस्तक्षेप पनि गम्भीर स्थिति रहेको धारणा व्यक्त गर्नुभयो ।
उहाँले चेतावनी दिनुभयो– ‘यदि नेपाली जनता समयमै सचेत नभए देशमा विदेशीहरूको शासन स्थापित हुने खतरा छ ।’
विशेषगरी जेनजीका माग भ्रष्टाचार अन्त्य, सुशासन र राष्ट्रिय स्वाधीनतासँग जोडिएको उल्लेख गर्दै अध्यक्ष केसीले ती मुद्दामा दृढतापूर्वक उभिएको दल राष्ट्रिय जनमोर्चा भएकाले जेनजी पुस्ताले पनि राजमोलाई रोज्नुपर्ने धारणा व्यक्त गर्नुभयो ।
कार्यक्रममा राजमो केन्द्रीय सल्लाहकार तथा तराई मधेस जनवादी मोर्चाका अध्यक्ष बद्रे आलम, कम्युनिस्ट सङ्ग्रहालयका अध्यक्ष चेतनाथ आचार्य, अखिल नेपाल किसान महासङ्घ (अप्फा) का नेता चन्द्रबहादुर केसी, अखिल नेपाल ट्रेड युनियन महासङ्घ (अन्टुक) का अध्यक्ष लोकराज भुसाल, राजमो लुम्बिनी प्रदेश समितिका कोषाध्यक्ष गणेश गौतम, नेकपा (मसाल) रुपन्देहीका प्रवक्ता लालचन्द पन्थलगायतले मन्तव्य राख्नुभएको थियो ।
राजमो रुपन्देहीका कावा अध्यक्ष इन्दिरा उपाध्यायको अध्यक्षतामा अघि बढेको उक्त कार्यक्रमको सञ्चालन गङ्गालाल सापकोटाले तथा स्वागत मन्तव्य लालबहादुर क्षेत्रीले राख्नुभएको थियो ।
