काठमाडौं । प्रधानसेनापति पूर्णचन्द्र थापाले नवनियुक्त प्रहरी महानिरीक्षक शैलेश थापा क्षेत्रीलाई बधाइ दिनुभएको छ । शुक्रबार प्रहरी प्रधान कार्यालयमा भेटघाट गरी नेपाल प्रहरीको सर्वोच्च पदमा नियुक्त भएकोमा प्रधानसेनापति थापाले महानिरीक्षक क्षेत्रीलाई सफल कार्यकालको शुभकामना दिनुभएको हो ।
भेटघाटका अवसरमा प्रधानसेनापति थापा र प्रहरी महानिरीक्षक थापा क्षेत्रीबीच दुवै संगठनबीच आपसी हित, सहकार्य र समन्वयका सम्बन्धमा छलफल समेत भएको थियो ।
प्रधानसेनापति थापाले प्रहरी महानिरीक्षक थापा क्षेत्रीलाई अनुभव र ज्ञानको संगालो रहेका पुस्तकहरू र राष्ट्रको सुरक्षाको संकेतको रुपमा रहेको राष्ट्रिय हतियार खुकुरी समेत प्रदान गर्नुभयो ।
त्यस अवसरमा प्रहरी महानिरीक्षक क्षेत्रीले प्रधानसेनापति थापालाई मायाको चिनो स्वरूप ‘मोमेन्टो’ प्रदान गर्नुभएको जंगी अड्डाले जनाएको छ ।
