काठमाडौं । नेपाल कम्युनिष्ट पार्टी (मसाल)ले नेपाल र नेपालीहरूको अस्मिताका विरुद्ध पीतपत्रकारिता गरिरहेका भारतीय न्युज च्यानलविरुद्ध प्रेस काउन्सिल र नेपाल पत्रकार महासंघले गरेको प्रतिवादके स्वागत गरेको छ ।
यस्तै, भारतीय टेलिभिजन च्यानलहरूको प्रसारण रोक्न मल्टि सिस्टम अपरेटर (एमएसओ) हरूको निर्णय तथा नेपाल केवुल टेलिभिजन महासंघका निर्णयहरूको पनि मसालले सराहना गरेको छ ।
शुक्रबार एक वक्तव्य प्रकाशित गरी मसाल प्रवक्ता रामप्रकाश पुरीले ति च्यानलको प्रस्तुतीमा भारतीय साम्राज्यवादको कुरूप र घीनलाग्दो तस्वीर उदाङगो भएको बताउनुभएको छ । उहाँले प्रधानमन्त्री केपी शर्मा ओलीको चरित्रहत्या मात्रै नगरेर नेपालको स्वतन्त्रता, सार्वभौमिकता तथा स्वाधीनताको विरुद्ध अफवाह पूर्ण र तथ्यहीन समाचारहरू सम्प्रेषण गरिरहेका बताउनुभएको छ ।
उहाँले नेपालकै पनि कतिपय मिडियाले आफ्नो पार्टीका महामन्त्री मोहनविक्रम सिंह लगायतका नेताहरु विरुद्ध अफवाहपूर्ण सामग्री दिने गरेको भन्दै सचेत पनि गराउनुभएको छ।
यस्तो छ वक्तव्यः
‘भारतीय सञ्चार माध्ययमहरूले नेपालका प्रधानमन्त्री केपी शर्मा ओलीको चरित्रहत्या गरेर समाचार सम्प्रेषण गरिरहेका छन् । संसारमा पत्रकारिताको पेशा सम्मानित छ र त्यस क्षेत्रले पालना गर्ने बिभिन्न राष्ट्रिय तथा अन्तर्राष्ट्रिय कानुनहरू पनि निश्चित गरिएका छन् ।
भारतीय टेलिभिजनहरूले पत्रकारिता सम्बन्धीका न्यूनतम मापदण्डको पनि हेक्का गर्न सकेका छनैन् र नेपालको स्वतन्त्रता, सार्वभौमिकता तथा स्वाधीनताको विरुद्ध अफवाह पूर्ण र तथ्यहीन समाचारहरू सम्प्रेषण गरिरहेका छन् । त्यसरी चरित्र हत्या वा कुनै स्वतन्त्र मुलुकको सार्वभौमिकताका विरुद्ध समाचार सम्प्रेषण गरेर कार्य गर्नु आपत्तिजनक, निन्दनीय र अपराधिक छ । हामीले भारतीय टेलिभिजनहरूको उक्त कार्यको निन्दा र भ्रत्र्सना गर्दछौँ ।
आफ्ना देशको पत्रकारिताको स्थिति कसरी गुज्रिरहेको छ वा के गर्दै छ ? भन्ने प्रश्नमा मोदी सरकार बेखवर रहेको वा अहिलेसम्म ती टेलिभिजनहरूको निन्दनीय कार्यमाथि कुनै नियन्त्रण नुहुनुले स्वयम् मोदी सरकार पनि त्यो कार्यमा सामेल रहेको बुझिन्छ । भारतीय टेलिभिजनहरूले नेपालका प्रधानमन्त्रीको चरित्रहत्या वा नेपालका विरुद्ध जुन समाचार सम्प्रेषण गरिरहेका छन्, त्यसले भारतीय मिडियाहरूको स्तरमा पनि गम्भीर प्रश्न खडा गर्दछ । त्यसप्रकारको स्तरका लागि भारतीय मिडिया क्षेत्र मात्र जिम्मेवार छ वा स्वयम् भारत सरकारको प्रेस नीति समेत जिम्मेवार छ रु आउने दिनहरूमा अन्तर्राष्ट्रिय रूपमा नै त्यो कुरा अरू प्रष्ट हुँदै जाने छ ।
भारतीय साम्राज्यवादले नेपालको सार्वभौमिकताका विरुद्ध षडयन्त्रकारी कार्य गर्दै आएको छ र अहिले भारतीय टेलिभिजनहरूले नेपालका विरुद्ध प्रसारण गरिरहेका कार्यहरू त्यही षडयन्त्रको सिलसिला भएको कुरा स्पष्ट छ । नेपालका भूभाग लिपूलेक, कालापानी, लिम्पियाधुरा क्षेत्रमा भएको भारतीय साम्राज्यवादी अतिक्रमणका विरुद्ध नेपाली जनताले सङ्घर्ष गर्दै आएका छन् । त्यस सन्दर्भमा नेपालको संसदले पनि नयाँ नक्सा जारी गरिसकेको छ । यस विषयमा भारतीय सञ्चार माध्यमहरूले नेपालको सार्वभौमिकता, स्वतन्त्रता र स्वाधीनताका विरुद्ध अभियान नै सञ्चालन गरेका छन् । उनीहरूको त्यो कार्यले भारतीय साम्राज्यवादको कुरूप र घीनलाग्दो तस्वीरलाई व्यक्त गर्दछ ।
भारतीय सञ्चार माध्यमहरूको पीत पत्रकारिता र चरित्रहत्याको कार्यका विरुद्ध नेपालमा प्रेस काउन्सिल र पत्रकार महासङ्घले गरेको विरोध तथा प्रतिवादलाई हाम्रो पार्टीले स्वागत गर्दछ । त्यसैगरी नेपाल र नेपालीहरूको अस्मिताका विरुद्ध पीतपत्रकारिता गरिरहेका भारतीय टेलिभिजन च्यानलहरूको प्रसारण रोक्न मल्टि सिस्टम अपरेटर (एमएसओ)हरूको निर्णय तथा नेपाल केवुल टेलिभिजन महासङ्घका निर्णयहरूको पनि हाम्रो पार्टीले स्रहाना गर्दछ । यसका साथै भारतीय मिडियाहरूको नेपाल विरुद्धको षडयन्त्र, चरित्रहत्या, तथ्यहीन तथा पीतपत्रकारीताका विरुद्ध एकजुट हुन हामी सम्पूर्ण जनतालाई एकतावद्ध हुन अपील गर्दछौँ ।
चरित्रहत्या गरेर समाचार सम्प्रेषण गर्ने कार्य सम्पूर्ण पत्रकारिता जगतको लागि निन्दनीय र भ्रत्सनीय छ । त्यसप्रकारको पीत पत्रकारिताको अवस्था नेपालमा पनि कायम छ । त्यो कुरा स्वयम् हाम्रा पार्टीका महामन्त्री का. मोहनविक्रम सिंहका विरुद्ध सम्प्रेषण गरिएका बिभिन्न पत्रपत्रीका, अनलाइन पत्रीका तथा सामाजिक सञ्जालहरूमा प्रकाशित लेख तथा समाचारहरूले पुष्टि गर्दछन् । का. सिंहका विरुद्ध श्रीमतीलाई मन्त्री बनाउनका लागि दौडधूप गरेको भन्ने जस्ता कपोलकल्पित समाचारहरू तथा बिभिन्न छद्म नामधारीहरूका सिआइए शैलीका लेखहरू पटकपटक प्रकाशित हुने गरेका छन् । राष्ट्रिय जनमोर्चाका अध्यक्ष का. चित्रबहादुर के.सी.का विरुद्ध पनि त्यसप्रकारका लेख प्रकाशित भएका छन् ।
त्यस्तै राष्ट्रिय जनमोर्चा उपाध्यक्ष तथा सांसद का। दुर्गा पौडेलका विरुद्ध पनि त्यसप्रकारका लेख प्रकाशित भएका छन् । त्यसरी नै अन्य कैयौँ कामरेडहरूका विरुद्ध पनि अफवाहपूर्ण समाचार सम्प्रेषण गर्ने कार्य हुँदै आएका छन् । त्यसप्रकारको पीतपत्रकारिताका विरुद्ध हाम्रो पार्टीले कानुनी सङ्घर्ष पनि गरेको छ । पीतपत्रकारिता सत्य–तथ्यका विरुद्ध अपनाइने कार्यशैली हो । यसले समाजलाई भ्रमित बनाई भ्रष्टाचारणमा भड्काउँछ । त्यसैले त्यसप्रकारको प्रवृत्तिमाथि नियन्त्रण कायम राख्नका लागि नेपाल सरकारले पनि ध्यान पुर्याउनुपर्ने आवश्यकता छ ।
सङ्घीय समाजवादी पार्टीले आफ्नो पार्टीका सांसद सरिता गिरीलाई पार्टी तथा सांसदबाट नै निष्काशित गर्ने कार्यलाई हाम्रो पार्टीले स्वागत गर्दछ । सांसद गिरीले नेपालको नयाँ नक्सा संसदबाट पारित गर्ने कार्यको विरोध गरी भारतीय साम्राज्यवादको दलाली गरेकी थिइन् । त्यसप्रकारको कार्य गर्ने व्यक्तिलाई कारवाही गरेर सङ्घीय समाजवादी पार्टीले स्रहानीय कार्य गरेको छ । आगामी दिनहरूमा पनि सबै मधेशवादी सङ्गठनहरूले त्यसरी नै नेपालको राष्ट्रियता र सार्वभौमिकताको पक्षमा आफूलाई दृढतापूर्वक उभ्याउन सके धेरै राम्रो हुने थियो र हामीले त्यसप्रकारको आशा पनि गर्दछौँ ।
देशका बिभिन्न भागमा बाढी पहिरोको कारण ठूलो धनजनको क्षति भएको छ । यसतर्फ सतर्कता अपनाएर नागरिकको जीउधनको रक्षा गर्नका लागि नेपाल सरकारले खास ध्यान दिएको देखिंदैन । बाढी पहिरोको सम्भावना रहेका देशका सबै भागहरूमा आवश्यक सतर्कता र पूर्व तयारीका साथ कार्य गर्नका लागि हामीले नेपाल सरकारको ध्यान आकर्षित गर्दछौँ । यसका साथै बाढी पहिरोको कारणले भएको क्षतिका लागि पीडितहरूको उद्धार गर्दै राहतको उचित व्यवस्था गर्नका लागि पनि हामीले सरकारसित माग गर्दछौँ ।’
