केरसिंह अदै, तौलिहवा ।
अखिल नेपाल किसान महासङ्घ (अप्फा) का अध्यक्ष भैरवराज रेग्मीले देश नेपाली जनता र राजनीतिक पार्टीको हातमा नरहेको धारणा व्यक्त गर्नुभएको छ ।
राष्ट्रिय जनमोर्चा कपिलवस्तुले २०८२ मङ्सिर २४ गते बुधबार चन्द्रौटामा आयोजना गरेको प्रचारात्मक सभामा प्रमुख अतिथिको आसनबाट सम्बोधन गर्दै उहाँले यस्तो अभिव्यक्ति दिनुभएको हो ।
‘जसरी जेनजी आन्दोलनबाट असंवैधानिक तरिकाले सुशीला कार्की सरकार स्थापना गरियो, प्रतिनिधिसभा विघटन गरियो’ उहाँले भन्नुभयो– ‘त्यसैगरी राजनीतिक पार्टी पनि विघटन भए ।’
उहाँले जेनजी आन्दोलनको माग सही हुँदाहुँदै पनि वैदेशिक शक्तिकेन्द्र, एनजिओ/आइएनजिओले उपयोग गरेको बताउँदै अहिले देशको राष्ट्रियतामाथि सङ्कट पैदा भएको पनि बताउनुभयो ।
‘राष्ट्रियता, गणतन्त्र र धर्मनिरपेक्षताको रक्षा गरौँ, सङ्घीयता खारेज गरौँ’ मूल नारासहित वर्तमान राजनीतिक अवस्थामा राजमोको धारणा स्पष्ट गर्ने उद्देश्यले उक्त सभा आयोजना गरिएको थियो ।
राजमो जिल्ला अध्यक्ष रामप्रसाद बेलबासेको अध्यक्षतामा अघि बढेको उक्त कार्यक्रमलाई सम्बोधन गर्दै नेकपा (मसाल) कपिलवस्तुका प्रवक्ता माधव भाटक्षत्रीले राजमोले राष्ट्रियता, गणतन्त्र र धर्मनिरपेक्षताको रक्षा तथा सङ्घीयता, एमसिसी खारेजीका लागि निरन्तर सङ्घर्ष गर्दै आएको बताउनुभयो ।
कार्यक्रममा अप्फाका केन्द्रीय उपाध्यक्ष शिव पौडेलको आतिथ्य रहेको थियो ।
सो अवसरमा रक्तिम सांस्कृतिक अभियानका कलाकारहरूले विभिन्न गीत तथा नृत्य प्रस्तुत गर्नुभएको थियो ।
राजमो कपिलवस्तुका कोषाध्यक्ष तथा शिवराज नगर समितिका अध्यक्ष केहरसिंह पुनमगरको स्वागत मन्तव्यसँगै अघि बढेको उक्त कार्यक्रमको सञ्चालन राजमो जिल्ला सचिव केरसिंह अदैले गर्नुभएको थियो ।
