कञ्चनपुर । राष्ट्रिय जनमोर्चाले भारतीय सीमा सुरक्षा बल (एसएसबी) द्वारा सडक निर्माणमा अवरोध भएको कञ्चनपुरको बेलौरी नगरपालिका वडा नं ८ पचुईको स्थलगत निरीक्षण गर्न भएको छ ।
राजमोका केन्द्रीय सदस्य एवं सुदूरपश्चिम इन्जार्च मनोज भट्ट नेतृत्वको टोलीले बिहीबार सो क्षेत्रको अवलेकन गर्नुका साथै स्थानीय जनताको राय तथा समस्याबारे जानकारी लिनेछ ।
नेता भट्टका अनुसार स्थलगत अवलोकन पछि त्यहाँको समस्याबारे यही असार २८ गते कञ्चनपुरका प्रमुख जिल्ला अधिकारीसँग छलफल गर्ने कार्यक्रम छ
केही दिनअघि भारतीय नागरिक र एसएसबी नेपाल प्रवेश गरी पूर्व पश्चिम हुलाकी राजमार्ग कालोपत्रे गर्ने काममा अवरोध गरेका थिए । भारतीय पक्षले सडक निर्माण भइरहेको क्षेत्र भारतमा पर्ने भन्दै अवरोध गरेपछि कालोपत्रे गर्ने काम रोकिएको छ ।
भारतीय पक्षले विभिन्न बहानामा नेपाली सीमा भित्र आएर सडक निर्माणमा अवरोध गर्ने तथा सीमा अतिक्रमण गर्दै आइरहेको छ । कञ्चनपुरको दक्षिणी क्षेत्रमा बारम्बार भारतीय पक्षले नेपालीमाथि ददागिरी गरेपनि नेपाली प्रशासनले उनहरुका गतिविधि नियन्त्रण गर्न सकेको छैन ।
यता, बेलौरी नगरपालिका वडा नं २ बैजुडाँडास्थित सीमास्तम्भ नं २०७ बुधबार बिहान ढलेको छ । राजमोले सीमा अतिक्रमण सहित दक्षिणी क्षेत्रका समस्याबारे प्रशासनलाई अवगत गराउने र समाधानका लागि दबाब दिने जनाएको छ ।
