काठमाडौं । भारतको उत्तरप्रदेशमा पर्ने बलरामपुर जिल्लामा नेपालीहरू यात्रा गरिरहेको बस ट्रकसँग ठोकिँदा आगो लागेको छ ।
आगोमा जलेर बसमा सवार ३ जनाको मृत्यु पुष्टि भएको स्थानीय वलरामपुर का एसपी योगेश प्रतापले बताए । प्रतापले मूल प्रवाह अखिल भारत नेपाली एकता समाजका केन्द्रीय उपाध्यक्ष कपिल खनाललाई दिएको जानकरी अनुसार २४ जना घाइते भएका छन् । तीमध्ये ६ जनाको अवस्था गम्भीर छ । मृतक एकजनाको नाम राधा गुल्मी निवासी लालबहादुरकी श्रीमति रहेको बताइएको छ भने दुईजनाको पहिचान खुल्न सकेको छैन ।
दामोदर भण्डारीले सञ्चालन गर्दै आएको शुभसाइट टुर एण्ड ट्राभल्सका यूपी २२ एटी ०२४५ नम्बरको बस र यूपी २१ डीटी ५२३७ नम्बरको ट्रक मंगलबार बिहान करिब साढे २ बजेतिर कोतवाली देहात थाना क्षेत्रको फुलबरिया सडकमा ठोक्किएका थियो ।
बस करिब १०० मिटरसम्म घिस्रिँदै गएर हाइटेन्सन लाइनको बिजुलीको खम्बासँग ठोक्किएको थियो । खम्बा भाँचिएर बसमाथि खस्दा करेन्ट फैलिएको र आगो लागेको भारतीय मिडियाहरूले जनाएका छन् ।
सो बस नेपाल–भारत सिमाना नजिकको सुनौलीबाट दिल्लीतर्फ जाँदै थियो । बसमा ४५ यात्रु सवार थिए । तीमध्ये अधिकांश नेपाली रहेको दैनिक भाष्करले जनाएको छ ।
