खलंगा (प्यूठान) । झिमरुक गाउँपालिकाका पूर्व प्रमुख तथा विद्यालयका पूर्व व्यवस्थापन समिति अध्यक्ष तिलक बहादुर जि.सीले आफ्‌ना पिताको नाममा अक्षयकोष स्थापना गर्नुभएको छ ।

जिसीले झिमरुक–४ बाङ्गेफेदीस्थित श्री लक्ष्मी माध्यमिक विद्यालयमा शिक्षा प्रवद्र्धन तथा सामाजिक दायित्वसहित अक्षयकोष स्थापना गरेको हो । झिमरुक गाउँपालिकाका पूर्व प्रमुख तथा विद्यालयका पूर्व व्यवस्थापन समिति अध्यक्ष समेत रहेका जि.सीले आफ्‌ना पिता चित्र बहादुर जि.सी. को चौरासी वर्ष पुगेको अवसरमा रु. १,०१,१५१/– (एक लाख एक हजार एक सय एकाउन्न रुपैयाँ) को ॅचित्र बहादुर जि.सी.–लक्ष्मी मा.वि. अक्षयकोष’ स्थापना गर्नुभएको हो ।

त्यस्तै, जिसीले भिमसेन आधारभूत विद्यालय, झिमरुक–४ बौडामा पनि समान रकम रु. १,०१,१५१/– को ‘चित्र बहादुर जि.सी.–भिमसेन आ.वि. अक्षयकोष’ स्थापना गर्नुभएको छ ।
दुवै अक्षयकोषको कुल राशि रु. २,०२,३०२/– (दुई लाख दुई हजार तीन सय दुई) पुगेको विद्यालयले जनाएको छ। अक्षयकोष हस्तान्तरणको लागि विद्यालयले विशेष समारोहको आयोजना गरेको थियो ।

कार्यक्रममा जिल्ला समन्वय समितिका प्रमुख धरम जि.सी. प्रमुख आतिथ्य, शिक्षाप्रेमी चित्र बहादुर जि.सी. विशिष्ट आतिथ्यता, अक्षयकोष संरक्षक तिलक जि.सी. र हरी जि.सी. विशेष आतिथ्यता रहेको थियो ।

कार्यक्रम श्री लक्ष्मी मा.वि. व्यवस्थापन समिति अध्यक्ष प्रेम बहादुर पुनको अध्यक्षतामा र प्रधानाध्यापक कर्ण बहादुर जि.सी.को सञ्चालनमा सम्पन्न भएको हो ।

दुवै विद्यालयका प्रतिनिधिहरूले अक्षयकोष दाताप्रति आभार व्यक्त गर्दै यस योगदानले विपन्न विद्यार्थीको भविष्य उज्यालो बनाउन महत्वपूर्ण टेवा पुग्ने बताए ।

विद्यालयका अनुसार, अक्षयकोषबाट उत्पन्न ब्याज रकम गरीब, दलित तथा आर्थिक रूपमा कमजोर विद्यार्थीहरूलाई छात्रवृत्ति वितरणमा उपयोग गरिने छ । विद्यालय समुदायले यो पहललाई दृर्घकालीन शैक्षिक लगानीका रूपमा लिएको छ ।