बुटवल । प्रदेश ५ का सांसद तारा जिसीले रुकुम पश्चिम घटनाका दोषीलाई उन्मुक्ति दिने प्रयास भइरहेको बताउनुभएको छ । प्रदेश सभाको बैठकमा बोल्दै सांसद जिसीले रुकुम पश्चिममा भएको सामूहिक नरसंहारका प्रमाणहरु नस्ट गर्ने र दोषीलाई बचाउने प्रयत्न भइरहेको दाबी गर्नुभयो ।
सो घटनाका दोषीले कुनै पनि हालतमा उन्मुक्ति नपाउन् भन्दै उहाँले घटनाको सत्य तथ्य बाहिर ल्याई दोषीलाई कडा भन्दा कडा कार्वाही गर्न सरकार सित माग गर्नुभयो ।
गत जेठ १० गते रुकुम पश्चिमको चौरजहारीस्थित सोती गाउँमा प्रेमिका भगाउन गएका नवराज विकसहित ६ जना युवाको स्थानीय गाउँलेले हत्या गरी भेरीमा फालेको प्रहरी अनुसन्धानले देखाएको छ । सो घटनामा युवतीका बुवा, दाइ र वडाअध्यक्षसहित २९ जना पक्राउ परेका थिए भने ३४ जनाविरुद्ध मुद्दा लगाइएको छ ।
फरक प्रशंगमा सांसद जिसीले प्रदेश भित्रका अधिकांश क्वारेन्टिनहरु स्वास्थ्य मापदण्ड अनुसार नभएको, पीसीआर परीक्षणमा दिनप्रतिदिन कमि आएको र संक्रमणका बिमारीको रेखदेखमा पनि उपेक्षा भएको बताउनुभयो । काठमाडौंका ढलमासमेत कोरोना भाइरस देखिएबाट अवस्था भयावह रहेको उहाँले औँल्याउनुभयो ।
वर्षातको समयमा तराईमा बाढी र पहाडमा पहिरोले जनधनको क्षति हुनथालेको भन्दै गम्भीर बन्न सरकारसँग आग्रह गर्नुभयो । यस्तै, उहाँले किसानलाई अति आवश्यक मल खादको समस्या समाधान गर्न माग गर्नुभयो ।
