काठमाडौं । प्रधानमन्त्री केपी शर्मा ओलीले आफू र राष्ट्रपतिविरुद्ध ठुलो षडयन्त्र भएको दाबी गर्नुभएको छ । शनिबार साँझ अकस्मात मन्त्रिपरिषदको बैठक बोलाएर प्रधानमन्त्री ओलीले राष्ट्रपतिलाई महाअभियोग लगाउने तथा आफूलाई प्रधानमन्त्री र पार्टी अध्यक्ष दुवै पदबाट हटाउने षडयन्त्र भइरहेको बताउनुभएको हो ।
प्रधानमन्त्री ओलीले मन्त्री र राज्यमन्त्रीहरूलाई आवश्यक परेमा मुख खोल्नुपर्ने भन्दै आफ्नो पोजिसन क्लियर गर्न निर्देशन दिएको एक मन्त्रीले बताए ।
‘अहिले ठूलो षड्यन्त्र भइरहेको छ । राष्ट्रपतिलाई महाअभियोग लगाउने र मलाई दुवै पदबाट हटाउने तयारी भएको छ । तपाईहरु कसको पक्षमा हुने ?’ प्रधानमन्त्रीको भनाई उदृत गर्दै एक मन्त्रीले भने, ‘आफ्नो पोजिसन छिट्टै क्लियर गर्नुस् ।’
प्रधानमन्त्रीले आफ्नो कुरा राखेपछि बैठकमा मन्त्रीहरू वर्षमान पुन, घनश्याम भुसाल, पार्वत गुरुङ लगायतले बोलेका थिए । मन्त्रीहरुले पार्टी बैठक र संसदीय दलबाटै निकाश खोज्नुपर्ने प्रधानमन्त्रीलाई सुझाव दिएको ति मन्त्रीले बताए ।
उनीहरुले मुख खोल्नुपर्ने अवस्था आएमा आफूहरुले आफ्नो कित्ता क्लियर गर्ने पनि बताएका थिए । यसको अर्थ अब प्रधानमन्त्रीलाई समर्थन नगर्ने मन्त्रीहरुले सामूहिक राजीनामा दिने सम्भावना देखिन्छ ।
पार्टीमा प्रधानमन्त्री ओलीको राजीनामा माग भइरहेका बेला उनले मन्त्री र सल्लाहकारहरुसँग परामर्श गर्नुभएको हो । यसअघि प्रधानमन्त्रीले शनिबार साँझ शितलनिवासमा राष्ट्रपतिसँग भेटघाट गर्नुभएको थियो । राष्ट्रपतिसँगको भेटमा ओलीले पार्टी फुटाउन सहज हुनेगरी अध्यादेश ल्याउने तयारी गरेको अनुमान गरिएको छ ।
यता, ओली इतर नेताहरुले आजै छुट्टै भेला गरेका छन् । अध्यक्ष पुष्पकमल दाहाल प्रचण्डको पहलमा नेकपा सचिवालयका ६ जना सदस्यले छुट्टै भेला आयोजना गरेका हुन् । ओलीसँग अब कसरी प्रस्तुत हुने भन्ने विषयमा रणनीति तय गर्न दाहालसहित सचिवालयका ६ जना साँझ दाहालकै निवास खुमलटारमा भेला भएका हुन् । अध्यक्ष दाहाल, वरिष्ठ नेता झलनाथ खनाल र माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ र रामबहादुर थापा भेलामा सहभागी थिए ।
नौ सदस्यीय सचिवालयमा अध्यक्ष ओलीसहित महासचिव विष्णु पौडेल र सचिवालय सदस्य ईश्वर पोखरेल मात्र ओलीको पक्षमा छन् । आपसी अविस्वास र द्वन्द्व बढ्दै गएपछि नेकपाको जारी स्थायी समिति बैठक आजको लागि स्थगित गरी सोमबारका लागि तय गरिएको छ ।
