गाजा सिटी । अमेरिकी राष्ट्रपति डोनाल्ड ट्रम्पले आइतवार इजरायलद्वारा गाजामा आक्रमण गरिएपछि पनि युद्धविराम कायम रहेको बताउनुभएको छ । उहाँका अनुसार गाजामा नौ दिनदेखि लागू भएको युद्धविराम अझै पनि प्रभावमा छ ।

इजरायली सेनाले हमासमाथि युद्धविरामको उल्लङ्घन गर्दै आफ्ना सैनिकमाथि हमला गरेको आरोप लगाउँदै गाजाको दक्षिणी क्षेत्रमा दर्जनौं हवाई आक्रमण गरेको थियो । यस्ता आक्रमणमा कम्तिमा ४५ जनाको ज्यान गएको गाजाको हमास–नियन्त्रित नागरिक सुरक्षा निकायले जनाएको छ ।

राष्ट्रपति ट्रम्पले पत्रकारहरूसँगको कुराकानीमा भन्नुभयो,“हो, युद्धविराम अझै पनि लागूमा छ ।”उहाँले युद्धविरामको उल्लङ्घनमा हमासको नेतृत्वको संलग्नता नरहेको सङ्केत गर्दै ‘केही विद्रोही समूह’ जिम्मेवार भएको बताउनुभएको छ ।

“हामी चाहन्छौं कि हमाससँगको स्थिति शान्तिपूर्ण होस्,“ ट्रम्पले भन्नुभयो,“तर यदि आवश्यक प¥यो भने कडा तर न्यायोचित ढङ्गले त्यसलाई समाधान गरिनेछ ।”

गाजाका चारवटा अस्पतालहरूले एएफपीलाई ४५ जनाको मृत्यु पुष्टि गरेका छन् । तर, गाजामा सञ्चार तथा पहुँचमा कठिनाइका कारण यस्ता विवरण स्वतन्त्र रूपमा पुष्टि गर्न नसकिने एएफपीले जनाएको छ ।

इजरायली सेनाले भने आफूहरूले युद्धविरामको पालना गरिरहेको तर कुनै पनि उल्लंघनप्रति कठोर प्रतिक्रिया जनाउने जनाएको छ । हमासले भने आरोपहरू अस्वीकार गर्दै इजरायलले युद्ध पुनः सुरु गर्ने बहाना बनाएको दाबी गरेको छ ।

सुरक्षा अधिकारीहरूले युद्धविरामको उल्लंघनको कारण देखाउँदै इजरायलले गाजामा राहत सामग्री प्रवेश अस्थायी रूपमा रोकिएको बताएका छन् । यसअघि पनि युद्धकालमा राहत रोकिँदा मानवीय सङ्कट गहिरिएको संयुक्त राष्ट्रसङ्घले जनाएको थियो ।

गाजाको मध्य भागस्थित अल–बुरेज शिविरमा बस्ने अब्दुल्ला अबु हसनिनले भन्नुभयो,“स्थिति फेरि युद्ध सुरु भएकोजस्तै देखिन्छ । हामीले शान्ति सम्झौता कायम रहोस् भन्ने आशा गरेका थियौं, तर इजरायलले कुनै सम्झौताकै सम्मान गर्दैन ।”

अमेरिकी उपराष्ट्रपति जेडी भान्सले खाडी मुलुकहरूलाई हमासलाई निशस्त्र बनाउने सुरक्षा संरचना निर्माणमा भूमिका खेल्न आह्वान गरेका छन्, जुन युद्धविराम सम्झौताको एक महत्वपूर्ण बुँदा हो ।

राष्ट्रपति ट्रम्पको २० बुँदे शान्ति योजनाअनुसार इजरायली सेनाले तथाकथित ‘यलो लाइन’ भन्दा पछाडि फौज हटाएको छ, जसले गाजाको झन्डै आधा भाग अझै पनि इजरायली नियन्त्रणमा रहेको जनाइएको छ ।

हमासले २० जना बाँचेकाहरूलाई इजरायललाई फिर्ता गरिसकेको छ र बाँकी मृतकहरूका शवहरू पनि क्रमशः फिर्ता गरिँदैछन् । इजरायलले आइतवार १५ जना प्यालेस्टिनीको शव फिर्ता गरेको गाजाको स्वास्थ्य मन्त्रालयले जनाएको छ, जसले हालसम्म फिर्ता गरिएका शवको सङ्ख्या १५० पुगेको बताएको छ ।

सन् २०२३ अक्टोबर ७ मा हमासद्वारा इजरायलमाथि गरिएको आक्रमणबाट सुरु भएको युद्धमा अहिलेसम्म गाजामा ६८ हजार १५९ भन्दा बढीको मृत्यु भएको गाजाको स्वास्थ्य मन्त्रालयले जनाएको छ । संयुक्त राष्ट्रसङ्घले ती तथ्याङ्कलाई विश्वसनीय मानेको छ ।