काठमाडौँ । सुनतस्करी प्रकरणमा पक्राउ परेका पूर्व सभामुखसमेत रहनुभएका नेकपा (माओवादी केन्द्र) का उपाध्यक्ष कृष्णबहादुर महरा पूर्पक्षमा जेलचलान भएका छन् ।
अदालतमा प्रस्तुत प्रमाण र बयानका आधारमा महरालाई तत्काल निर्दोष ठहर गर्न सकिने अवस्था नरहेको निष्कर्ष निकाल्दै पुर्पक्षका लागि थुनामा पठाउने आदेश गरेको हो ।
अदालतको आदेशसँगै महरालाई जगतनाथदेवल कारागार पठाएको जिल्ला अदालत काठमाडौंका सूचना अधिकारी दिपककुमार श्रेष्ठले जानकारी दिए ।
जिल्ला अदालत काठमाडौँले मुलुकी फौजदारी कार्यविधि संहिता–२०७४ को दफा ६७ र ८० बमोजिम २०८२ असोज २९ गते बुधवार थुनछेक आदेशपछि उहाँलाई पुर्पक्षका लागि थुनामा राख्ने आदेश दिएको छ ।
अदालतमा पेस भएको प्रारम्भिक प्रमाण र अनुसन्धान प्रतिवेदनअनुसार महराको चिनियाँ व्यापारी दावजिन वाङसँग निरन्तर सम्पर्क र पारिवारिक तथा व्यावसायिक सम्बन्ध रहेको बताइएको छ । दुवैबिचको मिलेमतोमा इसिगरेट (भेप) मार्फत सुनको तस्करी गरिएको आरोप लागेको हो ।
प्रमाणअनुसार महरासँगै उनका छोरा रेशम (राहुल) महरा र बुहारी विमला महराको मोबाइल नम्बरबाट समेत दावजिन वाङसँग पटक पटक कुराकानी भएको भेटिएको छ । महराले त्रिभुवन अन्तर्राष्ट्रिय विमानस्थल भन्सार कार्यालयका तत्कालीन प्रमुख अरुण पोखरेललाई फोन गरी जफत गरिएका सामानबारे भनसुन गरेको पनि प्रमाणित भएको अदालतको आदेशमा उल्लेख छ ।
भन्सार कार्यालयले २०७९ फागुन २१ गते इसिगरेट सात सय ३० थान जफत गरेको थियो, जसको न्यूनतम मूल्य पाँच लाख ११ हजार रुपैयाँ तोकिएको थियो तर उक्त इसिगरेटको आवरणमा करिब ९.५ किलो सुन लुकाइएको पाइएको अनुसन्धान प्रतिवेदनमा उल्लेख छ ।
सरकारले गठन गरेको सुनतस्करी नियन्त्रण छानबिन आयोग–२०८० को प्रतिवेदन, प्रहरीले बुझाएको प्रतिवेदन, मोबाइल कल डिटेल र प्रत्यक्ष साक्षीका बयान अदालतमा प्रमाणका रूपमा पेस गरिएको छ ।
छानबिनका क्रममा अभियुक्त दिनेश बस्नेतले उक्त इसिगरेटभित्रको सुन छ करोड रुपैयाँमा व्यापारी वेदप्रकाश अग्रवाललाई बिक्री गरेको बयान दिएका छन् । अग्रवाल र अन्य व्यक्तिका बयानले पनि आरोप पुष्टि गर्ने आधार बनेको छ ।
