खिमराज चालिसे, चन्डिगढ ।
भारतको चन्डिगढमा मूल प्रवाह अखिल भारत नेपाली एकता समाजको प्रगतिशील देउसीभैलो तयारी भेला सम्पन्न भएको छ ।
केन्द्रीय सचिवालय सदस्य दिनेश खड्काको उद्घाटनसँगै सो भेला अक्टोबर १२, २०२५ का दिन सम्पन्न भएको हो ।
सो अवसरमा मन्तव्य राख्दै उहाँले मातृभूमि कठिन अवस्थामा पुगेकाले साम्राज्यवाद विरोधी सङ्घर्षलाई अझै सशक्त बनाउनुपर्ने आवश्यकतामा जोड दिनुभयो ।
उहाँले राष्ट्रियता र संविधानको रक्षार्थ प्रवासीस्थित नेपाली पनि एकजुट हुनुपर्ने धारणासमेत राख्नुभयो ।
भेलामा क्षेत्रीय सदस्य एवम् सांस्कृतिक विभागका संयोजक जुना भण्डारी चालिसेले प्रगतिशील देउसीभैलोलाई सभ्य र भव्य रूपमा सम्पन्न पार्न सबैको योगदान रहनुपर्ने धारणा राख्नुभयो ।
कार्यक्रममा २०८२ सालको प्रगतिशील देउसीभैलोे कार्यक्रम, त्यसका लागि टिमको रूपरेखा सुदूर पश्चिमोत्तर क्षेत्रीय समितिका सहसचिव एवम् चन्डिगढ नगर समितिका सदस्य तेजबहादुर रोकाले प्रस्तुत गर्नुभएको थियो ।
भेलाले चन्डिगढमा प्रगतिशील देउसीभैलो चार दिनसम्म मानबहादुर केसी र थमन थापाको नेतृत्वमा दुईओटा टिम बनाएर सञ्चालन गर्ने निर्णय गरेको आयोजकले जनाएको छ ।
कार्यक्रममा केन्द्रीय सदस्य खिमराज चालिसे, केन्द्रीय परिषद् सदस्य थमन थापा, जनजाति विभागका प्रेम गुरुङ, अखिल भारत नेपाली विद्यार्थी सङ्घका केन्द्रीय सदस्य नारायण आचार्य, नगर अध्यक्ष राम पन्थी, समता विभागका रामबहादुर नेपाली, सांस्कृतिक विद्यार्थीकी सरस्वता भुसाल, महिला नगर संयोजक जमुना खनाल, महिला क्षेत्रीय सदस्यहरू सीमा खड्का, विष्णु अर्याल, लक्ष्मी अधिकारीलगायतको आतिथ्य रहेको थियो ।
बिनु नेपालीको सञ्चालन तथा नगर अध्यक्ष मानबहादुर केसीको अध्यक्षतामा सम्पन्न सो भेलामा उपस्थित सहभागीलाई विष्णु बेलबासेले स्वागत गर्नुभएको थियो ।
