काठमाडौँ । क्रान्तिकारी कम्युनिस्ट पार्टी नेपालको भारतस्थित भ्रातृ सङ्गठन अखिल भारत नेपाली एकता समाजमा फुट भएको छ ।
अक्टोबर १०, २०२५ (असोज २४ गते) मा प्रेसवक्तव्य जारी गर्दै देवबहादुर लामिछानेको नेतृत्वमा अर्को एकता समाज गठन भएको हो ।
सो समाजका केन्द्रीय कार्यालय सचिव नारायण शर्माको हस्ताक्षरमा जारी प्रेसवक्तव्यमा गत अक्टोबर ६ (असोज २० गते) मा बसेको भर्चुअल बैठकले अलग्गै केन्द्रीय समिति गठन गरेको दाबी गरेको छ ।
केही समययता क्रान्तिकारी कम्युनिस्ट पार्टीका नेता सन्तबहादुर नेपालीको उपस्थितिमा हैदरावादमा बसेको एकता समाजको बैठकका निर्णयबारे सामाजिक सञ्जालमै अन्तरविरोध छताछुल्ल हुने गरेका थिए ।
यससँगै एकता समाज दुई भागमा बाँडिएको छ । आनन्द थापा अध्यक्ष रहेको एउटा एकता समाज संस्थापन पक्षतिरै छ भने देवबहादुर लामिछाने नेतृत्वको अर्को एकता समाजको केन्द्रीय समिति अहिले सार्वजनिक भएको छ ।
लामिछाने नेतृत्वको एकता समाज दिल्ली क्षेत्रमा सक्रिय रहेको मानिन्छ ।
