खिमराज चालिसे, रेवाडी (भारत) ।
मूल प्रवाह अखिल भारत नेपाली एकता समाज रेवाडी नगर समितिको पहलमा सडक दुर्घटनामा मृत्यु भएका एक नागरिकको दाहसंस्कार गरिएको छ ।
सेप्टेम्बर २९, २०२५ का दिन निधन भएका बागलुङ काठेखोला गाउँपालिका–३ धम्जा निवासी ४८ वर्षीय छविलाल सार्कीको भारतको रेवाडीमा दाहसंस्कार गरिएको हो ।
राति पैदल हिँडिरहेका बेला बसले ठक्कर दिँदा उहाँको निधन भएको थियो । घटनाको जानकारी प्राप्त भएपछि निजलाई पुलिसले अस्पताल भर्ना गरे पनि चिकित्सकले मृत घोषणा गरेका थिए । त्यससँगै मूल प्रवाहका पश्चिमोत्तर क्षेत्रीय समितिका सलाहकार प्रेम अधिकारी, केन्द्रीय सदस्य ज्ञानप्रसाद शर्मा, नगर समितिका सचिव हिमलाल अधिकारीको पहकदमीमा आफन्तको खोजिनिती भएको थियो ।
मृतककी पत्नी दुर्गा सार्कीसहित पाँच जना आफन्ती नेपालदेखि अक्टोबर ३ का दिन रेवाडी आइपुगेपछि मृतकको दाहसंस्कार गरिएको थियो । दाहसंस्कारमा सन्दीप सोनी, विमला बस्नेत, भरत गुरुङ, मित्र परियार, रामप्रसाद, सुरेश विकलगायतको सहयोग रहेको थियो ।
दाहसंस्कारसँगै मृतकलाई क्षतिपूर्तिका लागि मालिकसँग सम्पर्क सहयोग प्राप्त नभएपछि त्यसका लागि कानुनी प्रक्रिया अगाडि बढाइएको मूल प्रवाहले जानकारी दिएको छ । नगर अध्यक्ष रामबहादुर खड्का, उपाध्यक्ष देवेन्द्र केसी, कोषाध्यक्ष जोगबहादुर आले, सहसचिव ऋतिका बस्नेत, विष्णु भन्डारी, महिला संयोजक शान्तिसिंह, पूर्व पदाधिकारी रिता केसी, पुलिस विभागमा कार्यरत पाचु सुनार, नगर समितिका लक्ष्मण श्रेष्ठ, रूपेश रोकाको सक्रियतामा कानुनी प्रक्रिया अघि बढेको थियो ।
मृतकका दुई अविवाहित छोरा जेठो छोरो सन्तोष किसन कुवेतमा र माहिलो दिलीप किसन साउदी अरबमा रोजगारी गरिरहेका छन् भने एक छोरी पूर्णिमा किसनको विवाह भइसकेको छ ।
मृतक छविलाल गत आठ वर्षदेखि रेवाडीमा मजदुरी गरिरहेका थिए ।
