बुटवल । प्रदेश ५ का सांसद तारा जिसीले सरकारी प्रचारले मात्र कोरोना संक्रमण नियन्त्रण नहुने बताउनु भएको छ । प्रदेश ५ को प्रस्तुत बजेटमापथ विषयगत छलफलमा भाग लिँदै राजमो प्रदेश सांसद तारा जिसीले सरकारको कोरोना महामारी नियन्त्रणमा बढाई चढाई गरेको कुरा र कोभिड बिशेष कोषको स्थापनाले महामारी नियन्त्रणमा नआउने बताउनुभयो ।
महिनौंसम्म पनि पीसीआर रिपोर्ट नआउने र नागरिकहरु समुदायमा घुलमिल भैसकेपछि रिपोर्ट पोजेटिभ आएर नागरिकले सास्ती भोग्नुपरेको उहाँले बताउनुभयो । आरडीटी औचित्यहिन रहेको भन्दै जिसीले पीसीआर परीक्षण ब्यापक बनाउनु पर्ने बेलामा सरकारले ध्यान त्यता जान नसकेको टिप्पणी गर्नुभयो ।
उहाँले महामारी नियन्त्रणमा सरकारको तयारी ‘खोदा पहाड निकला चुहा’ सावित भएको बताउनुभयो । विदेशबाट आउने प्रदेशका नागरिकको लागी बुटवलमा लुम्विनी वाणिज्य क्याम्पस होल्डिङ सेन्टर निर्धारण गरिए पनि विदेशमा महिनौं वेरोजगारीपछि उद्धनर गरिएका बेखर्ची नागरिक त्यहाँ रोगले भन्दा पनि भोकले मर्ने अनस्था रहेको उहाँले बताउनुभयो ।
स्थानीय तहका वडाहरुले सहयोग मागेर भएपनि एक छाक खानाको ब्यवस्था गरिरहेको स्मरण गराउँदै उहाँले प्रदेश सरकारबाटै नागरिकको उचित व्यवस्थापन गर्न माग गर्नुभयो । सामान्य अवस्थामा जस्तै जनताको जहाँ तहीँ आवत जावत र भिडभाडको अवस्थालाई सरकारले अनदेखा गरिरहेको र यही अवस्था रहेमा त्यसको परिणाम गम्भीर हुने चेतावनी दिनुभयो।
सांसद जिसीले सामुदायिक विद्यालयका अध्ययनरत निम्न वर्गका विद्यार्थी तथा कक्षा ११, १२ र स्नातकतहमा विज्ञानका छात्राहरुलाई छात्रवृतीको व्यनस्था गरी प्रोत्साहन गर्नुपर्ने बताउनुभयो । यस्तै, सीमा क्षेत्रमा बसोबास गर्ने नागरिक र विपन्न वर्गका मानिसहरुको समस्याप्रति प्रदेश सरकारको ध्यानकर्षण गराउनुभयो ।
