लोकेन्द्र पौडेल (दक्षिण भारत)
चेन्नई पश्चिम । जैमिनी नगरपालिका ८, छिस्ती खोलाखानी निवासी दुर्गा बहादुर रायमाझीको चेन्नईमा दुखद निधन भएको छ । बर्ष ५० का रायमाझी रोजगारीका शिलशिलामा चेन्नई अम्बातुरस्थित प्राईभेट कम्पनिमा कार्यरत थिए ।
मूल प्रवाह अखिल भारत नेपाली एकत समाज चेन्नई पश्चिम नगर समितिका सदस्य समेत रहेका रायमाझीको २१ सितम्बरको साँझ करिब साढे सात बजे हार्टअटेकका कारण निधन भएको बताइएको छ ।
रायमाझी बाबा कविराज रायमाझी र आमा शुशिला रायमाझीका माईला छोरा थिए । बजार गएर फर्कने क्रममा रिंगटा लागेर एकैछिन बाटोमै बस्दै गरेको र ढलेको अबस्थामा उनका आफन्तले एम्बुलेन्समा चेन्नईस्थित किल्पाक मेडिकल कलेज एण्ड हस्पिटलमा भर्ना गराई चेकजाँच गराएका थिए ।भोलिपल्ट बिहान करिब साढे छ बजे हस्पिटलले उनको मृत्यु भएको घोषणा गरेको जानकारी दिएको थियो ।
घटनाको जानकारी मूल प्रवाह अखिल भारत नेपाली एकता समाज दक्षिण भारत क्षेत्रिय सचिवालय सदस्य बुद्धिराम पौडेललाई प्राप्त भए लगत्तै बिभिन्न नगर समितिहरूबाट मूल प्रवाहका कार्यकर्ताहरू हस्पिटलमा पुग्ने र अगाडीको प्रकृया तथा नेपालमा रहेका मृतक रायमाझीकी श्रीमती, छोरा, छोरीलाई मूल प्रवाह केन्द्रीय सदस्य तथा दक्षिण भारत क्षेत्रीय अध्यक्ष चन्द्र बहादुर थापाले चेन्नई आउन आवश्यक व्यवस्था मिलाउनु भएको थियो ।
२३ सितम्बरका दिन परिवार र मूल प्रवाहका नेता कार्यकर्ताको उपस्थितिमा आवश्यक प्रशासनिक प्रक्रीया पुरा गरिएको थियो । २४ तिसम्बरका दिन परिवारजन, आफन्तजन, मूल प्रवाह अखिल भारत नेपाली एकता समाजका नेता कार्यकर्ताहरू, भाईचारा संगठनका समाजसेवी व्यक्तित्वहरू, कम्पनी स्टाफलगायतको उपस्थितिमा अम्बतुरस्थित डनलप शवदाह गृहमा अन्तिम दाहसंस्कार गरिएको छ ।
सोही दिन मूल प्रवाह चेन्नई पश्चिम नगर सचिव किशोर शर्माको सञ्चालनमा शोक सभा सम्पन्न गरिएको थियो । मूल प्रवाहका कन्द्रीय सदस्य तथा दक्षिण भारत क्षेत्रिय अध्यक्ष चन्द्र बहादुर थापाले मृतक दुर्गा बहादुर रायमाझीको पार्थिव शरीरमा संगठनको झण्डा ओढाएर श्रद्धान्जली अर्पण गर्नुभएको थियो । संगठनको तर्फबाट बुद्धिराम पौडेलले शोक बक्तब्य पढेर सुनाउनु भएको थियो । चन्द्र बहादुर थापा, जनसम्पर्क समिति दक्षिण भारतका डि कृष्ण प्रसाद आचार्य, प्रवासी नेपाली संघको तर्फबाट पद्मा केसी, एकता समाजका महासचिव महेन्द्र बस्याल लगायतले शोक मन्तव्य राख्नुभएको थियो ।
यस दुःखद घडीमा मूल प्रवाह अखिल भारत नेपाली एकता समाज मृतक दुर्गा बहादुर रायमाझीप्रति भावपूर्ण श्रद्धाञ्जली अर्पण गर्दै शोकाकुल परिवारजनप्रति हार्दिक समवेदना व्यक्त गर्दछ ।
