बुटवल । राष्ट्रिय जनमोर्चाका प्रदेश सांसद तारा जिसीले ठेक्का लिएर लामो समयसम्म सम्पन्न नगर्ने ठेकेदारलाई दण्ड दिने व्यवस्था गर्न माग गर्नुभएको छ ।
प्रदेश ५ को आ व २०७७÷७८को बजेट माथि विषयगत छलफलमा भाग लिँदै सांसद जिसीले समयमा योजना सम्पन्न गर्ने निर्माण व्यवसायीहरुलाई प्रोत्साहन र नगर्नेलाई दण्डित गर्नुपर्ने बताउनुभयो ।
‘योजना ठेक्का लिएर काम नगरी योजना अलपत्र पार्ने निर्माण व्यवसायीहरुलाई दण्ड सजाय गर्ने कि नगर्ने?’ जिसीले प्रश्न गर्नुभयो।
योजना जिम्मा लिएर समयमा काम नगर्ने निर्माण व्यवसायीहरुलाई प्रतिवर्ष रकम थपेर पुरस्कृत गर्ने प्रथा बन्द गरी दण्ड र जरिवनाको साथै एउटा योजना पूरा नगर्दै थप ठेक्का दिन रोक लगाउनु पर्ने उहाँको धारणा थियो ।
जिसीले प्रदेशको विकास नीति देखाउने दाँत मात्र भएको ठोकुवा गर्नुभयो । कहाँ कहाँ कति बजेट कुन कुन शिर्षकमा जिल्लागत रुपमा बजेट विनियोजन भयो तथ्य र प्रमाणहरु आफैँ बोलेको उहाँले बताउनुभयो ।
सरकारलाई आफ्नै पहिलो स्थितिपत्रको स्मरण गराउँदै प्रदेशभरमा अत्यन्त पिछडिएका, अविकसित र गरिवीको रेखामुनि रहेका जनताको संख्या अत्यधिक भएको भनी प्युठान र कपिलवस्तु जिल्लालाई बताईएको तर विकास र अवसर दिने वेलामा सधैँ पक्षपात गरिएको उहाँले बताउनुभयो ।
प्रदेश सरकारले भौतिक पूर्वाधार विकासमा बजेटको ठूलो हिस्सा विनियोजन गरेको भन्दै त्यस अनुसार प्रतिफल न आएको तथ्य प्रस्तुत गर्नुभयो । सरकारको फितलो र अपारदर्शी विकास नीतिले गाउँ गाउँमा भ्रष्टाचार मौलाएको र गणतन्त्र समेत धरापमा परेको उहाँले बताउनुभयो ।
भौगर्भिक र वातावरणीय हिसावले संवेदनशील क्षेत्रमा श्रममा आधारित निर्माण पद्दती अबलम्वन गर्ने सरकासको नीति सकरात्मक रहेको औँल्याउंदै वातावरणीय, पर्यावरणीय,भू–स्खलन तथा रोजगारीका दृष्टिले पनि उपयुक्त भएको भन्दै उक्त कार्यक्रम ठोस योजना र क्षेत्र मूर्त रुपमा नआएको टिप्पणी गर्नुभयो ।
प्रदेश गौरवको आयोजना रामपुर कपुरकोट मार्ग छिटो छरितो सम्पन्न गर्न विशेष जोडको माग गर्दै कोइलावास भालुवाङ मच्छि भिमगिठे सडक भारत नेपाल र चीन जोड्ने सबै भन्दा छोटो दूरीको अत्यन्त पुरानो त्रिदेशीय रणनैतीक महत्वको सडक भारतीय कम्पनीले ठेक्का लिएर अलपत्र पारेकोमा अहिले ठेक्का तोडिएको र प्रदेशको जिम्मा रहेपनि उपयुक्त ध्यान नपुग्नु र रकम पनि नाम मात्रको विनियोजन गरिनु दुखदायी भएको बताउनुभयो ।
यस्तै, जनता आवास कार्यक्रम अन्तर्गत लक्षित वर्गको पहिचान कार्य विधि अनुसार नै हुने भनिएता पनि ब्यवहारमा त्यस्तो नभएको सर्वत्र गुनासो र असन्तोष रहेको औँल्याउदै कैयौं घरबार विहीन र लालपूर्जा विहीन भएको यो कार्यक्रमको विधिले त्यो तप्कालाई नसमेटको भन्दै सुधार र पूर्णताको आवश्यकता भएको वताउनुभयो ।
